Վահրամ Պողոսյանը ֆեյսբուքյան էջից հեռացրել է Աննա Հակոբյանի և գեներալ Մովսես Հակոբյանի միջև «հայտնի միջադեպի» մասին գրառումը

Արցախի նախագահի խոսնակ Վահրամ Պողոսյանն այսօր գրառում էր արել, որում անդրադարձել էր վարչապետի տիկին Աննա Հակոբյանի և գեներալ Մովսես Հակոբյանի միջև «հայտնի միջադեպին»։ Սակայն Factor.am-ը քիչ առաջ նկատեց, որ գրառումը հեռացված է։

Նշենք, որ գրառման մեջ, մասնավորապես նշված էր. «Հանուն արդարության այսօր կանդրադառնամ ՀՀ վարչապետի տիկին Աննա Հակոբյանի մասին տարածված մեկ միֆի, որ իբր մասնակցում էր ռազմական խորհրդի նիստերին և դրանցից մեկի ժամանակ միջադեպ է եղել գեներալ Մովսես Հակոբյանի հետ: Իրականում Աննա Հակոբյանը պատերազմի ժամանակ Արցախում գտնվելու օրերին ներգրավված էր բացառապես թիկունքային աշխատանքներով: «Հայտնի միջադեպ»-ի մասին խոսակցություններին մեկ անգամ արդեն առիթ եմ ունեցել անդրադառնալու՝ չբարձրաձայնելով իրականությունը, ինչը պատերազմի օրերին անթույլատրելի էր: Մովսես Հակոբյանի Արցախից առժամանակ բացակայելու փաստը ոչ թե որևէ խոսակցության, այլ կորոնավիրուսային հիվանդության և դրան հետևած թոքաբորբի պատճառով էր: Այս համատեքստից դուրս մնացած խոսակցություններն իրականության հետ որևէ աղերս չունեն»։

Factor.am-ը փորձեց կապ հաստատել Պողոսյանի հետ՝ պարզելու համար գրառումը հեռացնելու պատճառը, սակայն նրա հեռախոսահամարն անհասանելի էր։ Պողոսյանի ֆեյսբուքյան էջին արված մեր գրավոր հարցումը ևս մնաց անարձագանք։

Մերի Մարտիրոսյան