Ժողովրդի իրենց ուղղված արդարացված ատելությունը փորձում են այս ձևով զսպել. Ալեք Ենիգոմշյանը՝ Վիգեն Նազարյանի ձերբակալման մասին

«Շատ մտահոգիչ է, սա նշանակում է, որ հալածանքներն իրենց խայտառակ բնույթով շարունակվում են: Պետք է սպասենք և տեսնենք ինչպիսի «հայտնաբերումներով» են հանդես գալու»,- անդրադառնալով Հիմնադիր խորհրդարանի անդամ Վիգեն Նազարյանի ձերբակալմանը Factor.am-ին ասաց Հիմնադիր խորհրդարանի անդամ Ալեք Ենիգոմշյանը:

«Սա ցույց է տալիս, թե վարչախումբը, իշխանություններն, ինչպիսի վիճակում են ապրում: Ժողովրդի իրենց ուղղված արդարացված ատելությունը, զզվանքը փորձում են այս ձևով, իրենց կարծիքով, զսպել»,- հավելեց նա:

Նշենք, որ ըստ Հիմնադիր Խորհրդարանի հաղորդագրության՝ ԱԱԾ աշխատակիցները Վիգեն Նազարյանին ձերբակալել են «այլ երկրի համար աշխատելու» պատճառաբանությամբ: Ալեք Ենիգոմշյանը մտահոգիչ է համարում նմանատիպ մեղադրանքները՝ դրանք որակելով ողբերգական:«Օտար պետության ծառայելու հերյուրանքներ են տարածում այն իշխանությունները, ովքեր իրենք են այլ պետությունների, մասնավորապես մեկ պետության շահերը ներկայացնում, նրանց դրածոն են: Սա մտահոգիչ է, և եթե երկրի համար ողբերգական չլիներ, ապա բացառապես զավեշտալի կհամարեի»,- ասաց նա:

Ենիգոմշյանը նաև հավելեց, այնքան շատ հետապնդումներ, հալածանքներ, ձերբակալություններ և կալանավորումներ են եղել այս տարիներին Հիմնադիր խորհրդարանի կամ այլ պայքարողների նկատմամբ, որ դրանք պայմանավորել նախատոնական կամ հետտոնական շրջանով չի կարելի:

Լիլիթ Շաբոյան