27.04.2026 | 21:53
Հայաստանն ու Ադրբեջանը աշխարհի ամենառազմականացված երկրների շարքում են
Զինվորներին մենակ չթողնելով՝ մայոր Լևոն Սարգսյանը զոհվեց հանուն հայրենիքի. ՏԵՍԱՆՅՈՒԹ
Հասարակություն
09.11.2020 | 21:40
Լուսանկարում մայոր Լևոն Սարգսյանն է որդու հետ։ 8 ամիս ընտանիքից հեռու խաղաղապահ առաքելությունն իրականացնելուց հետո վերադարձել էր հայրենիք նոր բնակարան գնելու և հանգիստ ապրելու ակնկալիքով։
Ընտանիքի համար տոն էր, վերջապես հայրիկը տանն էր, այր ու կին ծրագրում էին, թե ինչպես են տոնելու ամուսնության 10-րդ տարին, բայց պատերազմը խառնեց բոլորի պլանները։
Սեպտեմբերի 20-ին՝ տուն գալուց 7 օր հետո, կրկին հրաժեշտ տվեցին Լևոնին․ մեկնում էր ծառայության։
Մայորի մայրը հիշում է՝ որդին պատերազմի լուրը լսելուց հետո արծվի պես տանից դուրս է սլացել: Բարի, քչախոս ու հավասարակշռված, ահա այսպես է որդուն բնութագրում մայրը։ Ասում է՝ ընտանիքում բոլորն էլ գիտեին, որ որդու համար առաջնայինը միշտ հայրենիքն էր։
Սպայի կինը հիշում է, որ սեպտեմբերի 27-ի առավոտյան Լևոնը իրեն հորդորել է մնալ հայրական տանը, խոստանալով, որ երեկոյան ինքը կգա, տուն կտանի։
34-ամյա մայորը կրթություն է ստացել նախ Մոնթե Մելքոնյանի անվան վարժարանում, հետո՝ Վազգեն Սարգսյանի անվան ռազմական համալսարանում։
Իր գործին նվիրված էր, պատմում են, որ նրա համար զինվորները հարազատ եղբայրների պես են եղել և նրանց մենակ չի թողել նաև մարտի դաշտում՝ Օմարի բարձունքում։
Լևոնը մեկ անգամ՝ 2014-ին՝ Ջաբրայիլում տեղի ունեցած դիվերսիոն հարձակումից հետո, հրաշքով փրկվել էր։ Հրաշքը, սակայն, երկրորդ անգամ տեղի չունեցավ։ Բեկորային վնասվածքից հետո արյունահոսությունը կանգնեցնել չէր հաջողվել։
Զոհվածի այրին արցունքն աչքերում ասաց՝ Համահայկական հիմնադրամին գումար է փոխանցել, ինքն էլ պատրաստ է ամեն ինչով աջակցել հայրենիքին, միայն թե այսքան կորցրած արյունը զուր տեղը չկորչի ու գալիք սերունդներն այլևս պատերազմ չտեսնեն։
Մանրամասները՝ տեսանյութում։
Լիլիթ Շաբոյան
