16.06.2026 | 18:02
Տեղի է ունեցել Հայաստանի և Նիդերլանդների վարչապետների հեռախոսազրույցը
Սամվել Բաբայանը «Իգլա»-ի գործով Հայաստան տեղափոխված անձին չի ճանաչում. փաստաբան
Հասարակություն
27.12.2017 | 13:41
«Սամվել Բաբայանը Դատախազության միջոցով Վրաստանից Հայաստան տեղափոխված Ռոբերտ Աղվանյանին չի ճանաչում, առերեսում տեղի չի ունեցել»,- անդրադառնալով «Իգլա» տեսակի դյուրակիր զենիթահրթիռային համալիրի ռազմամթերք հանդիսացող հրթիռի մաքսանենգության և դրա ապօրինի շրջանառության համար հետախուզման մեջ գտնվող Ռոբերտ Աղվանյանի Հայաստան տեղափոխվելուն՝ Factor.am-ին ասաց Սամվել Բաբայանի պաշտպան Ավետիս Քալաշյանը:
Անդրադառնալով դատական պրոցեսների վերսկսմանը և Բաբայանի պատժի հնարավոր խստացմանը, պաշտպանը նշեց. «Նախաքննության ավարտից հետո միայն պարզ կդառնա դատական պրոցեսներ կմեկնարկեն, թե՝ ոչ: Հետախուզվողին առաջին անգամ են հարցաքննելու, պետք է դեռ նրա հետ կապված հանգամանքները պարզվեն»:
Քալաշյանը նաև տեղեկացրեց՝ Բաբայանի գործով օրերս արդեն դիմել են Վերաքննիչ քրեական դատարան:
Նշենք, որ Սամվել Բաբայանը դատապարտվել է 6 տարվա ազատազրկման: Ըստ մեղադրանքի՝ Լեռնային Ղարաբաղի պաշտպանության նախկին նախարարը դրդել է մի խումբ անձանց ձեռք բերել, փոխադրել և պահել ապօրինի ռազմամթերք՝ «Իգլա» զենիթահրթիռային համալիրը, ինչպես նաև փոխարկման արդյունքում ձեռք է բերել հանցավոր ճանապարհով ստացված եվրո թղթադրամներ:
Լիլիթ Շաբոյան
