09.07.2026 | 11:03
Բայրամովը հայտարարել է, թե խաղաղության պայմանագիրը կարող է ստորագրվել ՀՀ Սահմանադրության փոփոխությունից հետո միայն
«Սասնա ծռերի» անդամ Արմեն Բիլյանն արդեն 7-րդ օրը հացադուլի մեջ է
Հասարակություն
25.12.2017 | 15:14
«Սասնա ծռեր» խմբի անդամ Արմեն Բիլյանը 7-րդ օրն է, ինչ հացադուլ է հայտարարել: Factor.am-ի հետ զրույցում Բիլյանի պաշտպան Արմինե Ֆանյանն ասաց, որ բողոքի նման ճաապարհ ընտրելու պատճառն առողջական խնդիրներ են, որոնք պատճաշ ուշադրության չեն արժանանում. «Առողջական վիճակը հացադուլի պատճառով ավելի է վատանում, սակայն իմ պաշտպանյալն այլ ելք չի տեսնում, որովհետև բազմիցս դիմել ենք, սակայն որևէ քայլ չի ձեռնարկվել»:
Փաստաբանը նշեց, որ Բիլյանը որևէ հետազոտություն չի անցել, իսկ անցած տարի էլ կրկին առողջական խնդիրների պատճառով նա տեղափոխվել է քաղաքացիական հիվանդանոց բուժման, սակայն դա կատարվել է ոչ թե ՔԿՀ-ի, այլ իրենց ջանքերով: Այժմ ևս նա ունի առողջական խնդիրներ՝ կապված նյարդերի հետ. «Իրեն պատշաճ բժշկական օգնություն է պետք, սակայն ՔԿՀ-ում նման պայմաններ չկան, մի հատ ռենտգեն ապարատ ունեն, դա էլ դեռ հարց է՝ աշխատում է, թե՝ ոչ»:
Փաստաբանը նաև նշեց, որ Բիլյանը հացադուլը դադարեցնելու մտադրություն չունի՝ նա վճռական է տրամադրված և ասաց, որ մինչև վերջ գնալու է:
Հիշեցնենք, որ Արմեն Բիլյանը մեղադրվում է ՊՊԾ գնդի տարածքում ոստիկանության ավագ ենթասպա Գագիկ Մկրտչյանի սպանության մեջ, նրան մեղադրանք է առաջադրվել նաև Քրեական օրենսգրքի 238-րդ հոդվածի 4-րդ մասի 2-րդ կետով (զենք զինամթերք շորթելը, որը կատարվել է կազմակերպված խմբի կողմից, կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով) և 104 հոդվածի 2-րդ մասի 1-ին, 2-րդ, 3-րդ և 11-րդ կետերով:
Լիլիթ Շաբոյան
