Ախթալայի կոմբինատի պոչատարը պայթել է. կոմբինատի աշխատողները լվանում են հարակից դպրոցի տարածքը

Քիչ առաջ համացանցում լուր տարածվեց, որ Ախթալայի Լեռնահարստացուցիչ կոմբինատին պատկանող պոչատարը վթարվել է և ամբողջ պոչանքը տարածվել է Ախթալայի թիվ 2 դպրոցի այգում, ինչը կարող է վտանգել երեխաների առողջությունը: Դպրոցը գտնվում է լեռնահարստացուցիչ ֆաբրիկայից մոտ 50 մետր հեռավորության վրա:

Factor.am-ը պարզեց, որ վերջին ամիսներին այստեղ դասաժամեր չեն կազմակերպվում, քանի որ շենքում հիմնանորոգման աշխատանքներ են տարվում: Այս մասին Factor.am-ին հայտնեց Ախթալայի համար 2 դպրոցի տնօրեն Շուշանիկ Հոբոսյանը: Նա նաև հայտնեց, որ պոչատարը նոր չի վթարվել:

«Դա եղել է դեկտեմբերի 11 ի գիշերը: Պայթել է պոչամբարից պոչանքը տեղափոխող խողովակը, և մեր շենքի տարածքն ու այգին աղտոտվել են: Վթարը վաղուց վերացվել է: Այս պահին կոմբինատի աշխատողները լվանում են տարածքը: Աղտոտվել է հին ասֆալտը դպրոցի մոտ և այգին: Շինարարները նոր ասֆալտ են այդտեղ փռելու: Բայց այս պահին սա մեզ համար խնդիր չէ: Մենք ժամանակավորապես տեղափոխվել ենք այլ տարածք՝ համայնքում հարմարեցված շենք կա, որտեղ անցկացվում են դասերը: Մի տարուց նոր տեղափոխվելու ենք», – հայտնեց տնօրենը:

Նրա խոսքով՝ կոմբինատի աշխատողները երկու անգամ են լվացել դպրոցի բակն ու այգին՝ վթարից անմիջապես հետո և այսօր, երբ սոցիալական ցանցերից մեկում հայտնվեց վթարի մասին տեղեկությունը: «Մեր ամբողջ հողն է փչացել, այս մի այգին մաքրելն ի՞նչ է տալու: Պետք է այն ժամանակ մտածեին, երբ դպրոցի մոտով պոչատար խողովակ էին կառուցում: Եթե կա խողովակ, վթարը միշտ էլ կարող է լինել»,- ընդգծեց տնօրենը:

Մենք փորձեցինք կապ հաստատել Ախթալայի Լեռնահարստացուցիչ կոմբինատի հետ, սակայն այնտեղից հրաժարվեցին պատասխանել մեր հարցերին՝ պատճառաբանելով, որ տնօրենը տեղում չէ, իսկ լրատվական բաժին իրենք չունեն:

Բնապահպանության նախարարությունից էլ պատասխանեցին. «Տեսչական մարմինը տեղյակ է: Լուր լինելուն պես՝ կտեղեկացնենք»:

Ստացվում է, դեկտեմբերի 11-ին տեղի ունեցած վթարի մասին նախարարությունը դեռ լուր չունի:

Սյուզան Սիմոնյան