Բրիտանացի հետազոտողներն ուսումնասիրել են տեսանյութերն ու հաստատել, որ հայ ռազմագերիներին գնդակահարել են ադրբեջանցիները

Բրիտանական Bellingcat հետաքննական լրագրության մասնագիտական հարթակն անդրադարձել է Ադրբեջանի բանակի զինվորների կողմից հայ ռազմագերիների գնդակահարությանը։

Հետազոտողներն ուսումնասիրել են ադրբեջանական տելեգրամյան ալիքներով հրապարակված, այնուհետև ջնջված 2 տեսանյութերը։

Հոդվածում նշվում է, որ առաջին տեսանյութն ի սկզբանե հրապարակվել է տելեգրամի ադրբեջանական ալիքներով ու նշվել, որ գերեվարված երկու տղամարդիկ հայ զինվորներ են: Սակայն հետագայում այս հրապարակումները հեռացվել են կամ փոխարինվել Ադրբեջանի ՊՆ-ի հերքումներով այն մասին, որ տարածված տեսանյութը կեղծ է։

Օրինակ՝  տելեգրամի ադրբեջանական հայտնի ալիքներից մեկը՝ The Tagiev-ը, ջնջել է գրառումը՝ նշելով, որ տեսանյութերը բեմադրված են, քանի որ ձերբակալվածները «շատ կոկիկ են ընկել»:

Հետազոտողներն ուսումնասիրել են 2 տեսանյութերը և նշել, որ, այնուամենայնիվ, կան փաստեր, որ հրապարակված տեսանյութերն իրական են։

Հոդվածում նշվում է, որ առաջին տեսանյութում ցուցադրվում է ադրբեջանցի զինվորների կողմից երկու հայերի ակնհայտ գերեվարումը, իսկ երկրորդ տեսանյութում՝ նույն այդ երկու տղամարդկանց սպանությունը։

Նշվում է, որ առաջին տեսանյութում հայ տղամարդկանց գերի վերցրած զինծառայողները կրում են սաղավարտ, որը չի ծածկում ականջները: Չնայած նրան, որ սաղավարտի այս տեսակը տարբերվում է ադրբեջանցի զինվորականների կրած սաղավարտներից, այնուամենայնիվ, ադրբեջանական լրատվամիջոցների կողմից հրապարակված լուսանկարները ցույց են տալիս, որ այս ոճի սաղավարտները կրում են Ադրբեջանի հատուկ նշանակության ջոկատները:

Ձերբակալվածների հետ խոսվում է ռուսերեն, բայց հետազոտողներն արձանագրել են, որ զինվորները միմյանց հետ խոսում են նաև ադրբեջաներեն:

Իսկ ադրբեջանական կողմի այն պնդումները, որ տեսանյութում ոչ թե ադրբեջանցի զինվորներ են, այլ հայեր, քանի որ նրանցից մեկը կարմիր թևկապ է կրում, չի համապատասխանում իրականությանը, քանի որ կան նախկինում հրապարակված լուսանկարներ, որում ադրբեջանցի զինվորները կարմիր թևկապներ են կրում։

Նշվում է նաև, որ չնայած երկրորդ տեսանյութում հնարավոր չէ տեսնել սպանված մարդկանց դեմքերը, այնուամենայնիվ, նրանց հագուստը համընկնում է առաջին տեսանյութի տղամարդկանց հագուստի հետ:

Հոդվածի հեղինակներին նաև հաջողվել է որոշել տեսանյութերի նկարահանման մոտավոր տեղն ու ժամանակը։ Ըստ հետաքննող խմբի՝ դեպքի վայրը գտնվում է Հադրութ քաղաքի հյուսիսային եզրին, իսկ նկարահանումը, ամենայն հավանականությամբ, տեղի է ունեցել հոկտեմբերի 14-ին։

Հետազոտողները առաջին տեսանյութի ստվերային վերլուծությամբ պարզել են, որ  այն նկարահանվել է մոտավորապես ժամը 14:00-ին: Իսկ երկրորդ տեսանյութի ստվերային վերլուծությունը ցույց է տալիս, որ այն նկարահանվել է մոտավորապես ժամը 15:11-ին։

Անժելա Պողոսյան