16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Վարդենիս-Սոթք ճանապարհին միջադեպի հետևանքով երեխա է վիրավորվել
Հասարակություն
14.10.2020 | 14:31
Այսօր առավոտյան, ժամը 8:30-ի սահմաններում Վարդենիս-Սոթք ավտոճանապարհի մերձակայքում Ադրբեջանի ԱԹՍ-ի խոցման հետևանքով 13 տարեկան տղա է վիրավորվել: Այս մասին Factor.am-ին հայտնեց Գեղարքունիքի մարզի Գեղամասար համայնքի Շատվան վարչական շրջանի ղեկավար Արսեն Մինասյանը։
«Դա Վարդենիսի տարածքում է եղել, Վարդենիս-Սոթք ավտոճանապարհից 20-30 մետր այն կողմ՝ դաշտի մեջ։ Երեխան վնասվել է, տեղափոխվել է Երևան՝ վիրահատության։ Ասացին՝ բեկորը թոքն է վնասել։ Ինքը մեքենայի մեջ իրենց դաշտում է եղել։ Երեխայի հետ ծնողներն են եղել, պապիկը, բայց միայն երեխան է վնասվել»,- նշեց Մինասյանը։
Նրա խոսքով՝ իրենց տարածքում կրակոցները սովորական են դարձել։
«Ամբողջ գիշեր կրակոցներ են եղել՝ մինչև 3։30-ը, մի պահ դադարեցին, հետո 6։30-ից նորից սկսվեց։ Ողջ գիշեր արթուն ենք եղել, Աստված չանի՝ տագնապ լինի։ Մարդիկ դաշտերում աշխատանք ունեն, այսօր աշխատանքների համարյա 60 տոկոսը կանգնած է, մեկ-երկու տեղ աշխատանքներ կա, բայց քիչ է։ Տեխնիկա չես կարող միացնել»,- նշեց Շատվան շրջանի ղեկավարը։
Նրա խոսքով՝ ԱԹՍ-ի խոցման հետևանքով բռնկված հրդեհն արդեն գրեթե մարված է, անվտանգության նկատառումներից ելնելով՝ այս պահին Վարդենիս-Սոթք ճանապարահատվածը փակ է։ Տեղում աշխատանքներ է իրականացնում Արտակարգ իրավիճակների նախարարությունը։
Անժելա Պողոսյան
