ԱԱԽ շենքում վերջին անգամ վերանորոգում իրականացվել է օգոստոս ամսին

Օրերս մամուլը գրել էր, որ Ազգային անվտանգության խորհրդի շենքում արմատական, բարձրակարգ, «շատ թանկ» վերանորոգում է սկսվել՝ նկատելով, թե սկսված շքեղ վերանորոգումը վկայում է, որ այս «հիմնարկությունը» ղեկավարելու է երկրի ամենաազդեցիկ մարդկանցից մեկը, եթե ոչ՝ ամենաազդեցիկը:

Factor.am-ը նախագահի մամուլի քարտուղար Վլադիմիր Հակոբյանից հետաքրքրվեց, թե ինչ նպատակով են սկսվել վերանորոգման աշխատանքերը, որ ընկերությունն է զբաղվում վերանորոգմամբ և որքան գումար է տրամադրվել այդ աշխատանքներին: Մեր հարցմանն ի պատասխան, նախագահի մամուլի քարտուղարը տեղեկացրեց, որ ԱԱԽ շենքում վերջին անգամ վերանորոգում իրականացվել է այս տարվա օգոստոս ամսին. «ՀՀ Նախագահի աշխատակազմի Ազգային անվտանգության խորհրդի շենքի ընթացիկ վերանորոգման աշխատանքների ձեռքբերման նպատակով 26.06.2017թ. կազմակերպվել է համապատասխան մրցույթ, որին մասնակցելու հայտ է ներկայացրել թվով 3 կազմակերպություն: Հաղթող մասնակից է ճանաչվել ամենացածր գին (46.925.694 ՀՀ դրամ՝ ներառյալ ԱԱՀ) ներկայացրած «Քեյր Բիլդինգ Սերվիզիս» ՍՊԸ-ն, որի հետ 18.07.2017թ. կնքվել է համապատասխան պայմանագիր, համաձայն որի՝ մասնակիցն աշխատանքներն ավարտել է 31.08.2017թ.»:

Մենք նաև այցելեցինք Բաղրամյան 24 հասցեում գտնվող ԱԱԽ շենք, այնտեղ որևէ շինարարական աշխատանք չէր ընթանում: Շենքի հսկիչները ևս մեր հարցին ի պատասխան ասացին, որ շենքում աշխատանքերը վաղուց են կատարվել-ավարտվել:

Լիլիթ Շաբոյան