06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
Ադրբեջանը կիրառում է «Գեբելսի 10 օրենքները»՝ սուտը մատուցում է որպես ճշմարտություն․ Ռուբեն Աղուզումցյան․ ՏԵՍԱՆՅՈՒԹ
Քաղաքականություն
05.10.2020 | 16:20
Պատերազմն ընթանում է ոչ միայն պատերազմի դաշտում, այլև մարդկանց ուղեղներում, հոգեբանական տարածքում։ Ադրբեջանը պարբերաբար հայկական ինֆորմացիոն տիրույթ է նետում կեղծ լուրեր, որ, օրինակ, գրավել են այս կամ այն տարածքը, կոչ են անում քաղաքացիներին հեռանալ բնակավայրերից։
Հոգեբան, հոգեբանական գիտությունների թեկնածու Ռուբեն Աղուզումցյանը Factor TV-ի հետ հարցազրույցում ասում է, որ Ադրբեջանի այս մարտավարությունը նման է հոգեբանության մեջ հայտնի «Գեբելսի 10 օրենքները» մեթոդին՝ սուտը մատուցում է որպես ճշմարտություն։
«Դա մեկ նպատակ ունի՝ հնարավորինս թուլացնել մեր պայքարը, հակազդեցությունը, որովհետև հայերս հայրենասեր ենք, նման իրավիճակներում միացյալ ենք դառնում, և ուժը միացյալ լինելու մեջ է։ Ադրբեջանը փորձում է մեր միացյալ լինելը փլատակների ենթարկել։ Մարդիկ տարբեր են՝ մեկը զգայուն է, մյուսը զգայուն չէ, կան մարդիկ, որ կորուստ են ունեցել, որոշները սպասում են, որ կարող է կորուստ ունենան, և այս ինֆորմացիան տարբեր է ընկալվում։ Շատ զգույշ է պետք լինել, խոսքը մեծ ուժ է»։
Ռուբեն Աղուզումցյանը վստահ է՝ այսօր անհրաժեշտ է հոգեբանական ոչ խորը, առաջին անհրաժեշտության օգնություն ցուցաբերել, որպեսզի մարդն օտարացված, ուշադրությունից դուրս մնացած չզգա։
«Մեր պայքարը թուլացնելու ամենալավ ձևը խուճապի մատնելն է, որովհետև խուճապի ժամանակ ուղեղը չի կարողանում լավ, ճշմարիտ վերլուծություն անել, և վատ պատկերացումների ուղղությամբ է գնում։ Ադրբեջանցիները փորձ ունեն խուճապի առաջացման, ընդհանրապես՝ թուրքական ազգը խորամանկ է, ինչի մեջ կան այդ քայլերը։ Ասվում է կիսաճշմարտություն, օրինակ՝ «Մենք պայքարում ենք», և այդ բառից հետո ցույց է տրվում ինչ-որ բան, ավելի է մարդը հավատում։ Պետք է վերանցել այն աղբյուրները, որոնք այդ նպատակով են աշխատում, և մեր լրատվամիջոցները պիտի դառնան ավելի հստակ»,- ասում է հոգեբանը։
Իսկ ի՞նչ հետևանք կունենա այն, որ մարդիկ սկսեն հավատալ ադրբեջանական քարոզչամեքենայի կեղծիքներին։ Ռուբեն Աղուզումցյանն օրինակ է բերում վերջերս տեղի ունեցած մի դեպք․ «Շատ համոզված ձայնով «հայկական» սև հագուստով մեկն ասաց, թե սև մեքենայով մարդ է պտտվում Երևանում, հայտնում է՝ հավաքեք ուտելիք, իբր, Ղարաբաղ տանելու, հետո այդ ուտելիքի մեջ սրսկումներ է անում, քնեցնում է մեր զինվորներին, բայց հետո պարզվեց դա կեղծիք է։ Բայց մարդիկ կան, որոնք լսում են և նրանց վրա դա շատ է ազդում»,- նշեց Աղուզումցյանը։
Արցախի պատերազմը հայրենական է որակվում՝ լինել-չլինելու հարց է։ Նման իրավիճակներում, հաղթական լուրերից բացի, մարդիկ ստանում են նաև զոհերի, վիրավորների մասին տեղեկություններ, ինչպե՞ս պայքարել ընկճախտի դեմ։ Ըստ հոգեբանի՝ մարդիկ պետք է տիրապետեն իրենց․ «Որպեսզի մարդը դառնա բանական, ինքն իրեն պետք է տիրապետել կարողանա»։
Հարցազրույցն ամբողջությամբ՝ տեսանյութում։
Ռոբերտ Անանյան
