Իրանը հրաժարվել է Ռուսաստանից ՀՕՊ միջոցներ գնել՝ Իսրայելի կողմից դրանց ոչնչացումից հետո

Իրանին պետք չեն ռուսական C-400 զենիթահրթիռային համակարգերը, մեր սեփական համակարգերը շատ ավելի լավն են, ասել է Իսլամական հեղափոխության պահապանների կորպուսի (ԻՀՊԿ) բարձրաստիճան պաշտոնյան, փոխանցում է The Moscow Times-ը։

Դեռևս մեկ ամիս առաջ ռուսական հակաօդային պաշտպանության համակարգերը չկարողացան հետ մղել իսրայելական հրթիռային հարձակումը և, ըստ ԱՄՆ-ի և Իսրայելի հետախուզության տվյալների, ոչնչացվեցին։

Իրանը Ռուսաստանից չի պահանջել С-400 համակարգեր, հայտարարել է Իսլամական հեղափոխության պահապանների կորպուսի օդատիեզերական ուժերի գործողությունների գծով տեղակալ Դավուդ Շեյխանը հարցազրույցում, որը հրապարակել են երկրի պետական լրատվամիջոցները։

«Մեր ներկայիս համակարգերը շատ ավելի մեծ հնարավորություններ ունեն, քան С-400-ը»,- ասել է նա՝ հավելելով, որ Իրանն ակտիվորեն օգտագործում է նաև ռուսական արտադրության С-300 համակարգերը և С-400-ի անհրաժեշտությունը չի տեսնում։

Օգոստոսի սկզբին The New York Times-ը հայտնել էր, որ Իրանի ղեկավարությունը, վախենալով Իսրայելի հետ պատերազմից, Մոսկվայից խնդրել էր առաջադեմ հակաօդային պաշտպանության համակարգե, որոնք կարող են լինել C-400 Triumph համալիրները՝ Ռուսաստանի կողմից արտադրվող ամենաառաջադեմ հակաօդային պաշտպանության համակարգը:

Երբ Իսրայելը խոստացավ պատասխանել Իրանի հրթիռային հարձակմանը հոկտեմբերի 1-ին, իրանական լրատվամիջոցները սկսեցին չհաստատված տեղեկություններ հրապարակել, որ Ռուսաստանը Թեհրանին մատակարարել է առնվազն մեկ էսկադրիլիա Սու-35 կործանիչներ և չճշտված թվով С-400 համակարգեր, նշում է Euronews-ը։ Սակայն արդյունքում Իրանի հակաօդային պաշտպանությունը չկարողացավ դիմակայել իսրայելական հարձակմանը, որն իրականացվել էր հոկտեմբերի լույս 26-ի գիշերը մոտ 100 ինքնաթիռներով, այդ թվում՝ F-35 կործանիչներով։ Իսրայելին հաջողվեց շարքից հանել իրանական բալիստիկ հրթիռների համար վառելիք արտադրող 12 օբյեկտ։

Թարգմանությունը՝ Տաթև Ֆռանգյանի