ՀՀ-ում Tik Tok-ը արգելափակվե՞լ է․ պատճառներն ու վտանգները. ՏԵՍԱՆՅՈՒԹ

Երեկվանից Հայաստանի տարածքում արգելափակվել է Tik Tok հավելվածը, որի վտանգավորության մասին խոսվում էր նույնիսկ մինչ պատերազմական իրավիճակը։

Tik Tok-ի արգելափակման վերաբերյալ պաշտոնապես որևէ հայտարարություն չի արվել։ Factor TV-ն փորձեց ճշտել ԱԱԾ-ից։ ՀՀ ԱԱԾ մամուլի կենտրոնի պետ Արթուր Գևորգյանը նշեց, որ Tik Tok-ի հետ կապված որևէ մեկնաբանություն չեն տալիս, այդ թվում այն մասին՝ արդյո՞ք հավելվածն արգելափակելու հարց կա օրակարգում։

Ամեն դեպքում, հարյուրավոր օգտատերեր ֆեյսբուքյան գրառումներով ահազանգում են՝ հավելված մուտք գործել չեն կարող։

Ծրագրավորող, մեդիագրագիտության փորձագետ Սամվել Հայրապետյանը տեղեկացնում է․ «Անջատվել է ադրբեջանական կողմի ապատեղեկատվությունները և ֆեյք վիդեոների տարածումը կասեցնելու նպատակով։ Ում մոտ դեռ աշխատում է, շուտով կփակվի։ Բայց, ամեն դեպքում, պետք չի սպասել փակվելուն, ուղղակի հասկացեք, որ պետք չի մտնել «Տիկ-տոկ» մի պարզ պատճառով՝ Ադրբեջանը սարքած վիդեոներ է տարածում»։

Ինչո՞վ և ինչո՞ւ էր վտանգավոր Tik Tok-ը։ Օրինակներից մեկը ներկայացնում է «Քաղաքացու որոշում» կուսակցության գործադիր խորհրդի անդամ Գարեգին Միսկարյանը․ «Տիկ-տոկի ինչ-որ խելացի (թող ներեն ինձ եզները) տեսանյութ է նկարել, որ իբր սև Լադա մեքենայով ինչ-որ մեկը պտտվում է Երևանում և սնունդ է հավաքում զինվորներին ուղարկելու անվան տակ ու դեղ է լցնում մեջը։ Մի տարածեք էդ տեսանյութը, չկա նման բան»։

Նա նաև տեղեկացնում է, որ ՀՀ Ազգային անվտանգության ծառայությանը կարող է տրամադրել տեսանյութը։

Ծրագրավորող Սամվել Հայրապետյանը ևս այդ մասին գրառում էր կատարել․ «Էն սև լադա, թունավոր սնունդ բան սուտ ա, էդքան մի տարածեք, պատկան մարմինները 24/7 վերահսկում են թշնամու կողմից դաժէ էն ամենահիմար ու ամենախնդալու սցենարները»։

Tik Tok-ի վտանգավորության մասին 2 օր առաջ ճեպազրույցի ժամանակ խոսեց նաև ՄԻՊ Արման Թաթոյանը՝ երեխաներին ու ծնողներին կոչ անելով չօգտվել տվյալ սոցիալական ցանցից: Նրա խոսքով՝ ադրբեջանական կողմն այդ հավելվածում ահռելի ծավալի էթնիկ ատելության խոսք է գեներացնում հայերի նկատմամբ, ինչը միտում ունի վախի և տագնապի զգացում առաջացնել:

Հիշեցնենք՝ Tik Tok-ը չինական սոցիալական ցանց է, որտեղ 15 վայրկյան տևողությամբ տեսահոլովակներ կարելի է տեղադրել։ Ցանցի հիմնական օգտատերերը 10-ից 18 տարեկաններն են։

Ի դեպ՝ Ադրբեջանի սանձազերծած պատերազմի առաջին իսկ օրից մինչև հիմա Tik Tok-ը միակ արգելափակված սոցիալական կայքն է Հայաստանում, այն էլ՝ ադրբեջանական ապատեղեկատվությունը կանխելու համար։ Մյուս բոլոր հարթակներն ու կայքերը բաց են և հասանելի։ Մինչդեռ պատերազմի առաջին օրից Ադրբեջանում արգելափակվեցին բոլոր սոցիալական հարթակները՝ բացի Twitter-ից։

Մանրամասները՝ տեսանյութում։

Իրինա Մկրտչյան