25.09.2026 | 23:40
Եղիշե Մելիքյանը՝ Լատվիայի հավաքականի նկատմամբ հաղթանակի մասին. ՏԵՍԱՆՅՈՒԹ
Ի՞նչ է տեղի ունենում Հայաստանի ու Ադրբեջանի միջև․ միջազգային թատերաբեմում ակտիվացել են Թուրքիան ու Ռուսաստանը․ DW-ի անդրադարձը
Քաղաքականություն
29.09.2020 | 13:18
Լեռնային Ղարաբաղի հակամարտության շուրջ էսկալացիան, 1994 թվականին Բիշքեկում ստորագրված զինադադարից հետո առաջին անգամ, կրում է նման լայնածավալ բնույթ, գրում է DW-ի ռուսական ծառայությունը։
Chatham House բրիտանական հետազոտական ինստիտուտի Կովկասի հարցերով փորձագետ Լորենս Բրոերսն այս պահին Ադրբեջանում տիրող տրամադրությունները գնահատում է այսպես․ «Դիվանագիտությունը ձախողվել է։ Տեղին հարց է, թե ի՞նչ կարող է առաջարկել Բաքուն այսքան տարի տևած բանակցություններից հետո։ Միևնույն ժամանակ, Հայաստանը կարողացել է կոնսոլիդացնել Լեռնային Ղարաբաղի վրա վերահսկողությունը, քանի դեռ խաղաղ գործընթացն անվերջ տևում է»։
«Հայաստանի ղեկավարությունը կջանա ցույց տալ Բաքվի իշխանություններին, որ նրանք ստիպված կլինեն վճարել շատ ավելի մեծ գին այս էսկալացիայի համար, որը կչափվի զինտեխնիկայի ու կենդանի ուժի կորուստներով»,- այսպես է մեկնաբանում ՀՀ դիրքորոշումը Բրոերսը։
Նրա խոսքով՝ ՀՀ վարչապետ Նիկոլ Փաշինյանը ցույց է տվել, որ այնքան զուսպ չի վերաբերվում զինված հակամարտությանը, որքան իր նախկինը՝ Սերժ Սարգսյանը։ Բրոերսի դիտարկմամբ՝ Երևանում դիտարկում են «ակտիվ զսպման» ռազմավարությունը։
Միևնույն ժամանակ, պարբերականը գրում է, որ Հարավային Կովկասում էսկալացիային հաջորդել է հակամարտության լուծման հարցում միջազգային գործոնի թուլացումը։
«Մինսկի գործընթացը զգալիորեն միաբևեռ աշխարհի արդյունք էր, որն առաջացել էր սառը պատերազմի ավարտից հետո»,- ասում է Լոուրենս Բրոերսը։
Այն ժամանակ թվում էր, թե հակամարտությունն «ինչ-որ մի կերպ կլուծվեր լիբերալ աշխարհակարգի շրջանակում, սակայն այժմ ԱՄՆ ինքնամեկուսացել է, իսկ միջազգային թատերաբեմում ակտիվացել են Թուրքիան ու Ռուսաստանը։
