Քաղաքականություն
28.09.2020 | 14:09Հայաստանի դիվանագիտական զինանոցում թե՛ Արցախի անկախությունը ճանաչելու հարցը կա, թե՛ ռազմաքաղաքական դաշինքի հարցը կա, բայց այն, որ թեման այսօր հրապարակային քննարկման առարկա է դարձել, շատ կարևոր է: Այս մասին այսօր լրագրողների հետ ճեպազրույցում նշեց ԱԺ «Լուսավոր Հայաստան» խմբակցության ղեկավար Էդմոն Մարուքյանը:
Հարցին՝ արդյո՞ք միայն հարցի քննարկումն իրավիճակ է փոխել միջազգային արձագանքների կամ Ադրբեջանի արձագանքների առումով, Մարուքյանը պատասխանեց. «Ես չեմ հասցրել հետևել միջազգային արձագանքներին, բայց կարող եմ ասել, որ դա իր նշանակությունն ունի: Մենք տարբեր «զենքեր» ունենք և չպետք է այդ «զենքերը» բոլորը միանգամից կրակենք: Ըստ անհրաժեշտության՝ այդ հարցերը կդրվեն սեղանի վրա: Այս պահին ԱԺ-ի կողմից ընդունվող հայտարարությունն է որպես զենք կիրառվում: Եթե կարիք կլինի, նաև այլ «զենքեր» կկիրառվեն»:
Դիտարկմանը, որ նախօրեին ԲՀԿ խմբակցության պատգամավոր Նաիրա Զոհրաբյանն ասաց, թե հիմա հենց Արցախը ճանաչելու պահն է, Մարուքյանը նկատեց, որ ընդդիմությունը պետք է ավելի սուր պահանջներ դնի, իսկ իշխանությունը պետք է քննարկի դրանք:
«Մենք հիմա գտնվում ենք պատերազմի մեջ, և միջազգային դիվանագիտական տարբեր խողովակներով այս ուղերձները տեղ են հասնում, որ այս երկրում սկսել են նման քննարկումներ, և դրանից բխող հետևություններ են արվում»,- նշեց Մարուքյանը:
Անդրադառնալով հարցին, թե ինչ հետևանքներ կարող է ՀՀ-ի համար ունենալ Արցախի ճանաչումը, ԼՀԿ ղեկավարն ասաց, որ միշտ որպես հետևանք նշվել է այն, որ կարող է լինել պատերազմ։
«Բայց հիմա մենք մեծ պատերազմի մեջ ենք և, մեծ հաշվով, կորցնելու բան չունենք: Նաև երեկ լսել եմ, որ մարդիկ ասում են՝ ոչ թե ճանաչենք անկախությունը, այլ միացնենք Հայաստանին: Մեխանիզմներ կան, տարբեր տեսլականներ կան դրա հետ կապված: Բայց բոլորիս վերջնանպատակը մեր հայրենիքի վերամիավորումն է դե յուրե: Ես կարծում եմ՝ մենք մեր անելիքն այդ մասով արել ենք: Երեկվա նիստի ժամանակ մենք մեր անելիքը արել ենք, ուղերձները հղված են և հասել են համապատասխան տեղեր: Եթե ավելին պետք լինի, ավելին էլ կանենք»,- նշեց Մարուքյանը։
Անդրադառնալով միջազգային հանրության արձագանքին Ադրբեջանի կողմից սանձազերծված ագրեսիայի վերաբերյալ՝ Էդմոն Մարուքյանը վստահեցրեց, որ միջազգային մակարդակով հաստատված է, որ Ադրբեջանն է հարձակվել:
Մանրամասները՝ տեսանյութում:
