05.11.2026 | 23:32
Հայաստան-Լիտվա համագործակցություն․ Վահան Կոստանյանը աշխատանքային այցով մեկնել է Վիլնյուս
Բայդենը կարծում է, որ ԼՂ-ում իրադարձությունները կարող են հանգեցնել տարածաշրջանում կոնֆլիկտի
Քաղաքականություն
28.09.2020 | 11:25
Դեմոկրատական կուսակցությունից ԱՄՆ նախագահի թեկնածու Ջո Բայդենը կարծում է, որ Լեռնային Ղարաբաղում իրադարձությունները կարող են վերաճել տարածաշրջանում ավելի լայնածավալ հակամարտության։ Նա ամերիկյան գործող վարչակազմին կոչ է արել քայլեր ձեռնարկել՝ հրադադարի հասնելու համար։ ՏԱՍՍ-ի փոխանցմամբ՝ այս մասին ասված է գործչի հայտարարությունում։
«Ես խորապես մտահոգված եմ Լեռնային Ղարաբաղում սկսված ռազմական գործողություններով և անհապաղ դեէսկալացիայի, հրադադարի և Հայաստանի ու Ադրբեջանի միջև բանակցությունների վերսկսման կոչ եմ անում»,- ասել է Բայդենը։
Նրա խոսքով՝ ԱՄՆ-ն պետք է հասնի «շփման գծում մեծ թվով դիտորդների տեղակայման», ինչպես նաև ՌԴ-ին կոչ անի՝ դադարեցնել «սպառազինություն մատակարարել երկու կողմերին»։
ԱՄՆ նախագահի թեկնածուի կարծիքով՝ Վաշինգտոնը նաև պետք է «վերանայի իր ծրագրերը անվտանգության ապահովմանն աջակցության ոլորտում», որպեսզի ոչ մի սպառազինություն «հնարավոր չլինի կիրառել հարձակողական նպատակներով»։
Բայդենը Թրամփի վարչակազմին կոչ է արել ակտիվացնել դիվանագիտական փոխգործակցությունը «ԵԱՀԿ Մինսկի խմբի համանախագահներ Ֆրանսիայի և Ռուսաստանի հետ՝ խաղաղ կարգավորման նպատակով և վստահության ամրապնդման ոլորտում քայլեր ձեռնարկելու համար»։
Ջո Բայդենը կարծում է, որ Լեռնային Ղարաբաղում ռազմական գործողությունները կարող են հանգեցնել տարածաշրջանում ավելի լայնածավալ հակամարտության։ Նա «տարածաշրջանում երրորդ կողմին» կոչ է արել չմիջամտել հակամարտությանը։
