20.02.2026 | 02:07
Ադելիա Պետրոսյանը մեդալ չնվաճեց ձմեռային Օլիմպիական խաղերում
Սոցիալական կոլապս չունենք․ օգոստոսին առևտուրը նվազել է ընդամենը 2․5%-ով․ Փաշինյան. ՏԵՍԱՆՅՈՒԹ
Տնտեսություն
10.09.2020 | 11:19
Համաճարակը սոցիալական ու տնտեսական էական վնասներ է պատճառել, բայց շատ կարևոր է գնահատել այդ վնասները: Իհարկե, տնտեսական անկումների ցուցանիշները հրապարակվում են, հայտնի են: Այստեղ մենք միշտ ունենում ենք խնդիր՝ ունենալ ճշգրիտ ինդիկատորներ, թե ինչ սոցիալական իրավիճակ է տիրում երկրում և որքանով է այդ իրավիճակը սրվել: Այս մասին այսօր Կառավարության նիստում հայտարարեց ՀՀ վարչապետ Նիկոլ Փաշինյանը:
«Կա՞ն ցուցանիշներ, որոնք կօգնեն հասկանալ, թե ինչ չափի սոցիալական վատթարացում է եղել երկրում: Կարծում եմ, որ ՀԴՄ-ներով առևտրի շրջանառության տվյալը կարող է այդ մասին վկայել, որովհետև խոսքը մարդկանց կողմից արվող առևտրի մասին է: 2020 օգոստոսին, 2019-ի օգոստոսի համեմատությամբ, ՀԴՄ շրջանառությունը նվազել է ընդամենը 2.5 տոկոսով: Այս ցածր ցուցանիշին նոր ենք հասել, մարտից սկսած այդ ցուցանիշը բարձր էր, նվազում է: Այս թիվն ինքնին պետք է վկայի այն մասին, որ, անկասկած, ունենք սոցիալական խնդիրներ, բայց սոցիալական կոլապս և սոցիալական ճգնաժամ չունենք»,- նշեց Նիկոլ Փաշինյանը:
Վարչապետը նկատեց, որ այստեղ կարող է փաստարկ հնչել, որ նախորդ տարվա օգոստոսին շատ մարդիկ արտագնա աշխատանքի էին մեկնել, այս տարի չեն մեկնել, Հայաստանում են և ենթադրվում է, որ ինչ-որ առևտուր են անում:
«Բայց մյուս կողմից՝ այս տարի այստեղ չեն զբոսաշրջիկները, որոնք տրամաբանորեն շատ ավելի էին ծախսում ՀՀ տարածքում, քան տեղացիները: Բացի դրանից՝ չեն աշխատում թատրոնները, թանգարանները, հյուրանոցներն ընդհանրապես դատարկ են, ուղևորափոխադրումների, հարսանիքների թիվը քիչ էր… Այս թվերը ցույց են տալիս, որ ՀՀ-ում սոցիալական ճգնաժամ տեղի չի ունեցել: Իհարկե, ակնհայտ է, որ կա սոցիալական վիճակի վատթարացում: Մենք տնտեսական աճը կորցրել ենք, հունվարին և փետրվարին 9 տոկոս տնտեսական ակտիվության ցուցանիշ ենք ունեցել»,- ընդգծեց վարչապետը:
Մանրամասները՝ տեսանյութում:
