Առաջարկում եք զբոսայգում փուչիկ վաճառողը ՀԴՄ ունենա․ ինչպե՞ս ենք պատկերացնում․ Խաժակյան. ՏԵՍԱՆՅՈՒԹ

Երևանի ավագանու 5-րդ նստաշրջանի առաջին նիստում քննարկվում են Երևանի վարչական տարածքում գտնվող՝ պետության և համայնքային սեփականություն հանդիսացող ընդհանուր օգտագործման տարածքներում շրջածախ առևտրի իրականացմանը ներկայացվող պահանջները:

Երևանի քաղաքապետարանի աշխատակազմի առևտրի և սպասարկման վարչության պետ Հովիկ Սաֆարյանի խոսքով՝ շրջածախ առևտուր պետք է իրականացվի բացառապես ձեռքից՝ վաճառվող ապրանքները չդնելով գետնին: «Վաճառքի կամ ցուցադրության համար չեն կարող օգտագործվել գետնին դրվող տակդիրներ, այլ իրեր ու առարկաներ: Արգելվում է օգտագործել սայլակներ կամ շարժական այլ միջոցներ: Շրջածախ առևտուր իրականացնող աշխատողը պարտավոր է կատարել նաև այլ նորմատիվ իրավական ակտերով իր վրա դրված պարտականությունները»,- նշեց Սաֆարյանը:

Ավագանու «Լույս» խմբակցության ղեկավար Դավիթ Խաժակյանը բացասական է գնահատում այս փոփոխությունները։ Ասում է՝ սա չի բխում ամենախոցելի խմբի շահերից։

«Մենք քննարկում ենք, օրինակ, Կենտրոնի մանկական զբոսայգու փուչիկ վաճառողի հետ կապված կանոնակարգումներ, և առաջարկվում է, որպեսզի փուչիկ վաճառողը որևէ իրավաբանական անձի կարգավիճակ ունենա, ՀԴՄ սարք, որով կիրականացնի այդ գործառույթները։ Որքան ես առնչվել եմ այդ ոլորտի աշխատողների հետ, ընկալումս այնպես է եղել, որ իրենք մարդիկ են, որ ունեն սոցիալական ծանր պայմաններ և հատկացնում են մի քանի հազար դրամ, որպեսզի կարողանան դրանք իրացնել ու ինչ-որ գումար ստանալ։ Ես ուզում եմ հասկանալ՝ ինչպե՞ս ենք պատկերացնում, որ այդ մարդկանցից պահանջենք ձեռք բերել ՀԴՄ»,- հարց ուղղեց Խաժակյանը։

Սաֆարյանը նշեց, որ ՀԴՄ սարքի առկայությունը պարտադիր չէ, ձևակերպումը թույլ է տալիս օգտագործել վաճառքի փաստը հավաստող փաստաթուղթ։

Մանրամասները՝ տեսանյութում։