16.12.2025 | 15:10
ՀՀ ՊՆ-ն ԵՄ-ից 20 մլն եվրո կստանա // Թրամփը BBC-ից 5 մլրդ դոլար է պահանջում․ ԼՈՒՐԵՐ
Բաքուն Անկարային բողոքել է ՌԴ-ից Հայաստան զենքի մատակարարումներից և կրկին բացատրություն պահանջել
Քաղաքականություն
07.09.2020 | 20:18
Թուրքիայում գտնվող Ադրբեջանի նախագահի օգնական, Ալիևի աշխատակազմի արտաքին քաղաքականության հարցերի վարչության պետ Հիքմեթ Հաջիևը թուրքական HaberGlobal հեռուստաալիքի ուղիղ եթերում խոսել է Հայաստանի սահմանին տեղի ունեցած հուլիսյան մարտերից ու կրկին բողոքել, որ ՌԴ-ն «շարունակում է զինել» Հայաստանին։
«Հայաստան շարունակում են թռչել ԻԼ-76 ինքնաթիռները։ Այս երկիրն ավելի քան 500 տոննա զենք է ստացել։ Ի՞նչ նպատակ են հետապնդում այդ մատակարարումները։ Այս հարցի պատասխանը մենք այդպես էլ չենք ստացել»,- ասել է Հաջիևը։
Նա նաև նշել է, որ հարցը բարձրացրել են ռուսական կողմի հետ քննարկումներում։ Հետո Հաջիևը նորից մեկնաբանել է ՌԴ պաշտպանության նախարար Սերգեյ Շոյգուի խոսքերը, որ Գյումրիի ռուսական ռազմաբազա շինարարական նյութեր են տեղափոխվում։
«Դրանց տեղափոխման համար ինքնաթիռների անհրաժեշտություն չկա։ Այդ նյութերը կարելի էր տեղափոխել ավելի հեշտ ճանապարհներով։ Հետևաբար, պատասխանը մենք դեռ չենք գտել»,-ասել է Հաջիևը։
Հիշեցնենք՝ ավելի վաղ Հիքմեթ Հաջիևը կրկին դժգոհություն էր հայտնել Շոյգուի խոսքերի կապակցությամբ և բացատրություն պահանջել։
«Ռուսաստանից տարբեր ուղղություններով բեռներ են փոխադրվում Հայաստան։ Մենք ամբողջովին բավարարված չենք ռուսական կողմի բացատրությունից, սպասում ենք պարզաբանման, թե ինչի հիման վրա է շարունակվում Հայաստանի ինտենսիվ զինումը։ Մենք բավարարված չենք այն պատասխանով, որ ինքնաթիռները, իբր, շինանյութ են տեղափոխել։ Բեռները կարելի է տեղափոխել այլ ճանապարհով»,- ասել էր Հաջիևը։
Ի դեպ՝ թուրքական այդ հեռուստալիքն օրերս բավական ծավալուն ռեպորտաժ էր պատրաստել Ռուսաստանից Հայաստան մատակարարվող զենքի, հայ-ադրբեջանական սահմանի հուլիսյան մարտերի մասին և ներկայացրել, թե Ռուսաստանն անհանգստացած է թուրք-ադրբեջանական համագործակցությունից ու Հայաստանին, իբր, Ադրբեջանի դեմ պատերազմի է նախապատրաստում։
Էմմա Չոբանյան
