Շուկայում հայտնաբերվել է առողջության համար վտանգավոր հավի միս. արդյոք սա վարչապետի բնորոշմամբ՝ «շանտղություն» չէ

Հայկական շուկայում հայտնաբերվել է  առողջության համար վտանգավոր հավի միս, որը  ազատ վաճառքի է դրված: «Իրազեկ և պաշտպանված սպառող» ՀԿ նախագահ Բաբկեն Պիպոյանը նշում է, բարձիթողի վիճակի պատասխանատուն Սննդի անվտանգության պետական ծառայությունն է:

Դեռևս ամիսներ առաջ վարչապետ Կարեն Կարապետյանը հանձնարարել էր մանրամասն ուսումնասիրել, թե վաճառակետերում ինչ սնունդ են  մատուցում սպառողին, նա անգամ որակումներ էր հնչեցրել սննդի անվտանգության չափանիշներին  չհետևողների հասցեին. «Սննդի անվտանգության պետի փոփոխություն է եղել, որից պահանջվում է, որպեսզի հետևի, շանտղություն, ղալաթ կլինի, որ չհետևեն, թե մեր երեխան, մեր հարսը, մեր աղջիկն ինչ են ուտում»:

Ստացվում է, որ վարչապետի հորդորներին ոչ ոք չի հետևում: Եվ եթե համընդհանուր թանկացումների ֆոնին պիտի ուշադրության արժանանար արտադրանքի որակը, անցկացված ուսումնասիրությունները բոլորովին այլ պատկեր են ներկայացնում:

 «Կարող է ՍԱՊԾ-ն չի հասկանում, բայց Առողջապահության նախարարությունն էլ չի՞ հասկանում, որ՝  չի կարելի, ու առնվազն պետք է տեղ հասցնեն, որ չի կարելի ամեն օր մարդկանց տալ անտիբիոտիկներ ու ասել լավը չի: Տարբեր ուսումնասիրությունները ցույց են տալիս, որ հավի սպառման ծավալները, գառան, խոզի, տավարի մսի  թանկացմանը զուգահեռ մեծացել են, մարդիկ հիմա ավելի շատ հավի միս են գնում, որն անհամեմատ ավելի էժան է»,- իր անհանգստությունը հայտնեց Բաբկեն Պիպոյանը:

«Հետք» պարբերականի բացահայտումները վաճառքի դրված 9 տեսակի հավի մսի վերաբերյալ  սննդամթերքի շուկայում վերահսկողության  բացակայության արդյունք են: Ըստ պարբերականի ուսումնասիրության՝ 9 տեսակի հավերից 5-ը ենթակա չեն օգտագործման, սակայն սպառողները բանից անտեղյակ, գնում և օգտագործում են վտանգավոր սնունդը: Բաբկեն Պիպոյանը նշեց, «Հետքի» հրապարկումից հետո շուկան իրենք էլ են ուսումնասիրել և արձանագրել՝ վտանգավոր թռչնամիսը դեռ վաճառակետերում է:

Factor.am-ի հետ զրույցում  քաղաքացիներն իրենց անհանգստությունն  արտահայտեցին շուկայում  տիրող  վիճակի շուրջ:

Մինչ Սննդի անվտանգության ծառայությունից մեզ պատասխանում են, որ բոլոր հրապարակումները կընդունվեն որպես ահազանգ և ուսումնասիրելուց հետո իրենք անհրաժեշտ միջոցառումներ կձեռնարկեն, քաղաքացիները շարունակում են խանութներից գնել և օգտագործել վտանգավոր սնունդ:

Լիլիթ Շաբոյան