01.07.2026 | 10:55
Կատարի ԱԳ նախարարը Դոհայում հանդիպել է ԱՄՆ բանագնացներին․ սպասվում է Կատար-Իրան հանդիպումը
Գողություն «Մխիթար Սեբաստացի» կրթահամալիրում. տնօրեն Աշոտ Բլեյանը նշում է՝ ամեն ինչ տեսանկարահանված է
Հասարակություն
28.08.2020 | 13:23
Օգոստոսի 26-ին Երևանի «Մխիթար Սեբաստացի» կրթահամալիրից գողություն է կատարվել, ինչի վերաբերյալ հաղորդում է ներկայացվել ոստիկանություն։ Այս մասին Factor.am-ի հետ զրույցում տեղեկացրեց կրթահամալիրի տնօրեն Աշոտ Բլեյանը։
Դպրոցից գողացել են 2 նոութբուք, 1 հատ ֆոտոխցիկ, 2 հատ տեսախցիկ և 1 հատ ձայնագրիչ։
«Դրանք նյութական առումով արժեքավոր չէին, ուղղակի այդ 2 նոութբուքն իր մեջ մանկավարժական ինֆորմացիա էր պարունակում։ Դա ոչ մեկին պետք չէ, բացի այն ուսուցիչներից, որոնք տարիներ շարունակ այդ նոութբուքերն օգտագործել են որպես թվային միջոց՝ իրենց ուսումնահետազոտական նախագծերն իրականացնելու համար։ Տանողն այդ մասին հաստատ չի իմացել»,- նշեց դպրոցի տնօրենը։
Վերջինիս խոսքով՝ ոստիկանությունն օպերատիվ կերպով արձագանքել է ահազանգին, սակայն առայժմ կասկածյալ չկա:
«Ամեն ինչ տեսանկարահանված է, տանողը չի իմացել այդ մասին, նա երևի այդ ձևով փորձել է ինչ-որ հարց լուծել։ Վստահ եմ, որ ոստիկանությունը կգտնի։ Կրթահամալիրին պատճառված վնասը ոչ էական է, շատ արագ կվերականգնվի, ոչ նյութական արժեքն էլ վերականգնելի է, որովհետև ցանցում կա, ուղղակի ուսուցիչները պետք է փնտրեն, գտնեն, լրացնեն»,- նշեց Բլեյանը։
Ոստիկանությունից Factor.am-ին տեղեկացրին, որ գողության վերաբերյալ ահազանգը ստացել են օգոստոսի 26-ի առավոտյան, ինչի հիման վրա նյութեր են նախապատրաստվում։
Անժելա Պողոսյան
