Վանաձորի ավագանին լուծարելու ԼՀԿ-ի դիմումին կառավարությունը դեռևս չի արձագանքել. կուսակցությունում դրական ակնկալիքներ ունեն

Հայաստանի Կառավարությունը դեռևս չի արձագանքել Վանաձորի ավագանու գործունեությունը դադարեցնելու և նոր ընտրություններ նշանակելու մասին «Լուսավոր Հայաստան» կուսակցության ներկայացրած դիմումին: Factor.am-ի հետ զրույցում վարչապետ Կարեն Կարապետյանի մամուլի խոսնակ Արամ Արարատյանը նշեց՝ օրենքով սահմանված ժամկետում պատասխանը կտրվի:

«Դիմումը ստացել ենք, ապա ուղարկել Տարածքային կառավարման և զարգացման նախարարություն ու Կենտրոնական ընտրական հանձաժողով: Այն ուսումնասիրվում է և պատասխան կտրվի դիմումը ստանալուց՝ նոյեմբերի 24-ից հետո՝ 15- օրյա ժամկետում»,- նշեց վարչապետի խոսնակը:

Հիշեցնենք՝ նոյեմբերի 10-ին Սահմանադրական դատարանը որոշում կայացրեց՝ մասամբ բավարելով «Ելք» և «Ծառուկյան» խմբակցությունների 26 պատգամավորների հայցը և հակասահմանադրական ճանաչելով Վանաձորի ավագանու գումարած բոլոր նիստերը: Այս որոշմանը հաջորդեց «Լուսավոր Հայաստան»-ի՝ Վանաձորի ավագանին լուծարելու Կառավարությանն ուղղված դիմումը: Տարածքային կառավարման և զարգացման նախարարի մամուլի խոսնակ Կարինե Մանգասարյանը ևս փոխանցեց՝ դիմումն այժմ քննարկման փուլում է և սահմանված ժամկետում պատասխանը կներկայացվի կառավարությանը:

Հարցի առնչությամբ Կենտրոնական ընտրական հանձնաժողովի նախագահ Տիգրան Մուկուչյանը, մինչդեռ, Factor.am-ի հետ զրույցում հստակեցրեց՝ դիմումում բարձրացված հարցերը Կենտրոնական ընտրական հանձնաժողովի գործառույթ չեն հանդիսանում:

«Մերք մեր դիրքորոշումը սահմանված ժամկետում կտրամադրենք նաև կառավարությանը»,- նշեց ԿԸՀ նախագահը:

«Լուսավոր Հայաստան» կուսակցության նախագահ Էդմոն Մարուքյանի համար որևէ արտառոց բան չկա, որ իրենց դիմումի պատասխանն ուշանում է, պատգամավորը նշեց՝ գուցե մտածում են՝ ինչ պատասխանել:  Factor.am-ի հարցին՝ դիմումը մերժելու հիմնավորումներ կգտնե՞ն, Մարուքյանը պատասխանեց. «Մերժելու հիմնավորումներ չկան, տեսնենք՝ ինչ կպատասխանեն»: Էդմոն Մարուքյանը հավելեց՝ իրենք դրական պատասխան են ակնկալում:

Շողիկ Գալստյան