ՀՀԿ-ական պատգամավորը խոստովանում է՝ հաշմանդամություն ունեցող անձանց խնդիրների լուծման հարցում  իշխանությունը «մինուս» գնահատականի է արժանի

Ներկա և նախկին իշխանությունները «մինուս» գնահատականի են արժանի հաշմանդամություն ունեցող անձանց խնդիրների լուծման տեսանկյունից: Նման գնահատական հնչեցրեց Հանրապետական կուսակցության ներկայացուցիչ Մարգարիտ Եսայանը՝  «Հաշմանդամություն ունեցող անձանց խնդիրները Հայաստանում» թեմայով «Մեդիա կենտրոնում» անցկացված քննարկմանը: 

Ուշագրավ է, որ սեփական քաղաքական թիմի աշխատանքը քննադատելով Հանրապետական պատգամավորը չհերքեց՝ հաշմանդամություն ունեցող անձանց խնդիրները բազմաթիվ են, ավելին՝ պնդեց, որ ո՛չ հասարակությունը, ո՛չ պետությունն իրենց պարտականությունները չեն իրականացրել:

Factor.am-ը հետաքրքրվեց՝ ինչո՞վ են պայմանավորված իշխանությունների թերացումները, Հանրապետական պատգամավորը փորձեց պարզաբանել՝ խոսքը վերաբերում է ոչ թե իշխանությունների թերացումներին, այլև նոր օրենքի ընդունմանը, որն ուշացվել է:

Մարգարիտ Եսայանի խոսքով՝  առկա իրավիճակի բարելավմանը կնպաստի 1993 թվականից ընդունված և մինչ օրս գործող «Հաշմանդամների սոցիալական պաշտպանության մասին» օրենքի փոփոխությունը: Առաջիկայում Կառավարություն, ապա Ազգային ժողով կներկայացվի «Հաշմանդամություն ունեցող անձանց իրավունքների պաշտպանության և սոցիալական ներառման մասին» նոր օրենքիի նախագիծ, որն, ըստ Եսայանի, կբավարարի թե պետությանը, թե հաշմանդամություն ունեցող քաղաքացիներին:

Երևանի ավագանու «Ելք» խմբակցության անդամ, երկար տարիներ հաշմանդամություն ունեցող անձանց խնդիրներով զբաղվող Զարուհի Բաթոյանը ևս համաձայնեց՝ նոր  օրենքի նախագիծն էականորեն տարբերվում է գործողից:

Երևանի ավագանու «Ելք» խմբակցության անդամն, ի դեպ առաջարկ էր ներկայացրել Երևանի քաղաքապետարանում ստեղծել առանձին մարմին, որը կզբաղվեր հաշմանդամություն ունեցող անձանց խնդիրներով, այն սակայն մերժվել է:

Հավելենք, որ ըստ Աշխատանքի և սոցիալական հարցերի նախարության տվյալների՝ Հայաստանում հաշմանդամություն ունեցող մոտ 200 հազար անձ կա: