19.09.2026 | 16:22
Երևանում կանցկացվի բժշկական զբոսաշրջության գլոբալ համաժողով
ԱՄՆ Պետքարտուղարությունը Բելառուսի ընտրությունները համարում է «ոչ ազատ և արդար»
Քաղաքականություն
11.08.2020 | 11:08
ԱՄՆ պետքարտուղար Մայք Պոմպեոն դատապարտել է Բելառուսում ցուցարարների նկատմամբ գործադրված բռնությունները և կոչ է արել երկրի իշխանություններին ազատ արձակել բոլոր ապօրինի ձերբակալվածներին, հաղորդում է DW-ի ռուսական ծառայությունը:
Պոմպեոն իր մտահոգությունն է հայտնել առ այն, թե ինչպես են Բելառուսում անցկացվել նախագահական ընտրությունները՝ որակելով դրանք «ոչ ազատ և արդար»:
«Թեկնածուների՝ ընտրություններին մասնակցելու հնարավորությունների խիստ սահմանափակումը, տեղական անկախ դիտորդների ներկայությունը ընտրատեղամասերում արգելելը, ընդդիմության թեկնածուներին վախեցնելու տակտիկան, խաղաղ ցուցարարներին և լրագրողներին ձերբակալելը ստվերում են ընտրական գործընթացը»,- Պոմպեոն ասել է Պետդեպարտամենտի երեկ տարածած հաղորդագրության մեջ:
Միաժամանակ, նա ափսոսանք է հայտնել, որ ԵԱՀԿ/ԺՀՄԻԳ-ի դիտորդներին ժամանակին չեն հրավիրվել Բելառուսի ընտրությունները դիտարկելու:
«Մրցակցության սկզբունքի վրա հիմնված ազատ և արդար ընտրությունները բոլոր կառավարությունների հուսալիության և օրինականության հիմքն են», – ընդգծել է Պոմպեոն:
ԱՄՆ պետքարտուղարը հորդորել է Բելառուսի կառավարությանը հարգել բոլոր բելառուսցիների՝ հավաքներին մասնակցելու իրավունքը: «Բացի այդ, երկրի իշխանությունները պետք է զերծ մնան բռնության կիրառումից և ազատ արձակեն բոլոր նրանց, ովքեր ապօրինաբար են ձերբակալվել»,- ասել է Մայք Պոմպեոն:
«Մենք խստորեն դատապարտում ենք ցուցարարների նկատմամբ շարունակվող բռնությունները և ընդդիմության կողմնակիցների կալանավորումը, ինչպես նաև ինտերնետի անջատումը, որի նպատակն է թույլ չտալ բելառուսներին տարածեն ընտրությունների և ցույցերի մասին տեղեկատվություն», – ավելացրել է Պետդեպարտամենտի ղեկավարը:
Հիշեցնենք, որ նախագահական ընտրությունների պաշտոնական արդյունքների հրապարակումից հետո հազարավոր մարդիկ դուրս եկան փողոց՝ արտահայտելու իրենց դժգոհությունը իշխանությունների և ընտրակեղծիքների դեմ: Որոշ վայրերում բողոքի ակցիաները վեր են ածվել փողոցային անկարգությունների: Կան բազմաթիվ ձերբակալվածներ և վիրավորներ: Ըստ պաշտոնական տվյալների՝ ցուցարարներից մեկը մահացել է, երբ պայթուցիկ սարքը պայթել է ձեռքում: Բելառուսի ներքին գործերի նախարարությունը հաղորդել է, որ նա փորձել է չբացահայտված պայթուցիկ սարք նետել իրավապահների կողմը:
