Քաղաքականություն
08.08.2020 | 20:26
«Զվարթնոց» օդանավակայանից Բեյրութ է մեկնում Հայաստանից մարդասիրական օգնությամբ առաջին օդանավը։ Առաջիկայում ևս երկու օդանավ կմեկնի Լիբանան։
Կառավարության օգոստոսի 6-ի նիստում վարչապետ Նիկոլ Փաշինյանն ասել էր, որ Հայաստանն ուժերի ներածին չափով օգնություն է ցուցաբերելու Լիբանանի կառավարությանը և տեղի հայ համայնքին։
«ՀՀ կառավարությունը, ԱԳ նախարարության և սփյուռքի գործերի գլխավոր հանձնակատարի գրասենյակի միջոցով, մշտական կապի մեջ է Լիբանանի կառավարության և համայնքային կառույցների հետ։ Հստակեցվում են հիմնական կարիքները, որոնց շրջանակում էլ ՀՀ կառավարությունը թիրախային օգնություն կհասցնի Բեյրութ՝ ինչպես կառավարական, այնպես էլ համայնքային մակարդակով»,- ասել էր վարչապետը։
Հիշեցնենք, որ օգոստոսի 4-ին Բեյրութի նավահանգստում հզոր պայթյուն է տեղի ունեցել։ Ողբերգական պատահարի հետևանքով հարյուրավոր զոհեր և հազարավոր վիրավորներ կան։ Պայթյունի հետևանքով նաև 13 հայ է զոհվել, վիրավորների թիվը շուրջ 300 է։
