19.09.2026 | 17:03
Ռուբեն Ռուբինյանը դասային աստիճան է շնորհել
Լիբանանի իշխանությունները հրաժարվել են Բեյրութի պայթյունի միջազգային հետաքննությունից
Քաղաքականություն
05.08.2020 | 19:28
Լիբանանի իշխանություններն անհրաժեշտ չեն համարում Բեյրութի նավահանգստում տեղի ունեցած պայթյունի հետաքննությանը միջազգային փորձագետների ներգրավումը։ ՏԱՍՍ-ի փոխանցմամբ՝ այս մասին հայտարարել է Լիբանանի ՆԳ նախարար Մուհամմեդ Ֆահմին։
«Մենք Բեյրութի պայթյունի հետաքննությանը միջազգային փորձագետների մասնակցության կարիքը չունենք»,- ասել է նա։
Նախարարը նշել է նաև, որ տեղյակ չի եղել մայրաքաղաքի նավահանգստում տեղի ունեցողի մասին, մասնավորապես՝ այնտեղ պահվող պայթյունավտանգ բեռի։
«Այդ ամենի մասին զեկույցներն ինձ չեն հասել։ Ես տեղյակ չեմ եղել այդ թղթածրարի մասին, իսկ ես ոչ մի գործի վրա աչք չեմ փակում»,- հավելել է Ֆահմին։
Մինչ այդ, սակայն, Լիբանանի մաքսային ծառայության ղեկավար և Բեյրութի նավահանգստի տնօրեն Բադրի Դահերը հայտարարել էր, որ մաքսայինն ու Լիբանանի հասարակական անվտանգության գլխավոր վարչությունը բազմիցս խնդրել են նավահանգստի տարածքից դուրս բերել վտանգավոր բեռները, սակայն տարիներ շարունակ իրենց խնդրանքն անտեսվել է։
Հավելենք, որ Լիբանանի կառավարությունն այսօր կարգադրել է տնային կալանքի տակ առնել նավահանգստի ամբողջ վարչակազմին՝ «մինչև չսահմանվի կոնկրետ պաշտոնատար անձանց պատասխանատվությունը»։
Իշխանությունները խոստացել են ողբերգական պատահարի հանգամանքների ուսումնասիրությունն ավարտել հինգ օրվա ընթացքում։
