09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
Ակնալճի եզդիական սրբատեղիում հարգանքի տուրք են մատուցել Շանգալի եզդիների ցեղասպանության զոհերի հիշատակին
Հասարակություն
03.08.2020 | 21:15
Արմավիրի մարզպետ Համբարձում Մաթևոսյանն այսօր ԱԺ պատգամավոր Ռուստամ Բաքոյանի և եզդի համայնքի ներկայացուցիչների հետ Ակնալճի եզդիական սրբատեղիում մասնակցել է Շանգալի եզդիների ցեղասպանության զոհերի հիշատակին նվիրված միջոցառմանը, տեղեկացնում է Արմավիրի մարզպետարանի մամուլի ծառայությունը։
Մարզպետը ծաղիկներ է խոնարհել և ծաղկեպսակ դրել Իրաքում ԻԼԻՊ-ի հրոսակների կողմից իրականացված ցեղասպանության զոհերի հիշատակը հավերժացնող հուշակոթողին` լռությամբ ու խոնարհումով հարգելով նրանց հիշատակը: Համբարձում Մաթևոսյանն այցելել է նաև եզդիական սրբատեղիի հիմնադիր-հովանավոր Միրզա Սլոյանի շիրիմին` հարգանքի տուրք մատուցել նրա հիշատակին: Այնուհետև նա ծանոթացել է Շանգալի եզդիների ցեղասպանությանը նվիրված լուսանկարների ցուցադրությանը, ապա մասնակցել հիշատակի օրվան նվիրված հանդիպում-քննարկմանը:
«2014 թվականին այս օրը եզդիների օրացույցում սև շրջանակի մեջ վերցվեց. եզդիաբնակ Շանգալ բնակավայրում իսլամիստ ահաբեկիչների կողմից հարյուր հազարավոր եզդիներ սպանվեցին, սեռական բռնությունների ենթարկվեցին մեծաթիվ կանայք ու աղջիկներ: Շատերն էլ, չցանկանալով հավատափոխ լինել, ինքնասպան եղան` իրենց ցած նետելով ժայռերից:
Եզդիների ցեղասպանությունը ցնցեց նաև Հայաստան աշխարհը, հայ ժողովրդին. ամենուր ձևավորվեցին «օգնիր եզդիներին» համահայաստանյան խմբեր: Ցեղասպանություն ապրած հայ ժողովուրդը միջազգային տարբեր ատյաններում դատապարտեց եզդիների ցեղասպանությունը և մարդկությանը կոչ արեց սատար կանգնել եզդի ժողովրդին: Իսկ այսօր, մեր եղբայրական եզդի ժողովրդի հետ մի բռուցք դարձած, մենք ոգեկոչում ենք Իրաքի հյուսիսում եզդիների դեմ իրականացված ցեղասպանության զոհերի հիշատակը և կրկին դատապարտում մարդկության դեմ իրականացված և շարունակվող ոճրագործությունները:
Ինչ խոսք, այսօր նաև փաստում ենք, որ, հարյուր հազարավոր զոհեր ունենալով հանդերձ, եզդի ժողովրդին ցեղասպանել չի հաջողվել և չի հաջողվելու, որովհետև դարերի խորքից եկող այս ազգը պատրաստ է անգամ ինքնազոհողության գնով պահպանել իր հավատը և ազգային արժեքները: Եվ ուրեմն, փառք եզդի ժողովրդին, հավերժ խոնարհում հանուն ազգային արժեքների իրենց կյանքը զոհած մեր նահատակների հիշատակին: Թող աստված լույսի մեջ պահի նրանց հոգիները և իր օրհնությունը բերի եզդի ժողովրդին»,- իր ելույթում ասել է Արմավիրի մարզպետը:
