ԱԺ-ն ամբողջությամբ ընդունեց «Բնակչության բժշկական օգնության և սպասարկման մասին» օրենքում փոփոխություններ կատարելու մասին և մի շարք այլ նախագծեր

Ազգային ժողովը երկրորդ ընթերցմամբ և ամբողջությամբ ընդունեց «Բնակչության բժշկական օգնության և սպասարկման մասին» օրենքում փոփոխությունների նախագիծը, որով նախատեսվում է սահմանել արտակարգ իրավիճակներում նախարարության գործունեության պլաններ, որի հաստատման լիազորությունը վերապահվում է Կառավարութանը:

Ֆիքսում է, որ առնվազն 5 տարին մեկ այս պլանները պետք է վերանայվեն՝ կախված բժշկագիտության զարգացման միտումներից: Նախագծին կողմ քվեարկեցին 99 պատգամավորներ։ ԱԺ-ն երկրորդ ընթերցմամբ և ամբողջությամբ ընդունեց նաև մի շարք այլ օրենքներ։ Մասնավորապես՝ «Ընդերքի մասին» օրենքում փոփոխությունների նախագիծն ընդունվեց 98 կողմ ձայներով: Նախագծով առաջարկվում է արդյունահանման թույլտվություն չտրամադրել այն դեպքում, եթե տվյալ հանքավայրի պաշարները ուսումնասիրված և հաստատված չեն՝ մետաղականի համար՝ վերջին 5 տարվա, ոչ մետաղականի համար՝ վերջին 10 տարվա ընթացքում:

Հանքավայրերի և տեղամասերի պաշարները պետք է տրամադրվեն ամբողջական պաշարով, ոչ թե 50 տարվա ժամկետով, այլ մետաղականի համար մինչև 20 տարվա ժամկետով։ Կառավարությունը սահմանել է, որ ընդերքօգտագործման լիցենզիան կերկարաձգվի այն դեպքում, եթե ընդերքօգտագործողը աշխատանքները իրականացրած լինի առնվազն 70 տոկոսով։ Առաջարկվում են նաև բնապահպանական բարեփոխումներ, մինչև 500 հազար արտադրողականության հանքերի համար՝ չոր պոչերի տեխնոլոգիայի պարտադիր կիրառում, բոլոր մետաղական հանքերի համար՝ փակ շրջանառու համակարգի կիրառելիություն և վերամբարձ պոչամբարների արգելք։

Երկրորդ ընթերցմամբ և ամբողջությամբ ընդունվեց նաև «ՊՈԱԿ-ների մասին» օրենքում փոփոխությունների նախագիծը՝ 82 կողմ, 11 ձեռնպահ ձայներով: Նախագծով առաջարկվում է ՊՈԱԿ-ներին ամրակցված գույքը վարձակալության հանձնել բացառապես Կառավարության հաստատած կարգով։ Վարձակալությունից ստացված միջոցները 20-80 հարաբերակցությամբ բաշխվելու են ՊՈԱԿ-ի և պետբյուջեի միջև։ ԱԺ-ն երկրորդ ընթերցմամբ ընդունեց «Գովազդի մասին» օրենքում փոփոխությունների նախագիծը, որով բացառությունից կհանվի տեղական արտադրության կոնյակի գովազդը, և ժամը 06:00-22:30-ը դրա հեռարձակումը ևս կարգելվի:

Նախագծին կողմ քվեարկեց 95, դեմ՝ 1 դեմ պատգամավոր։