Ընդդիմության միջամտությունը պրոցեսին կասեցնում եք․ Գորգիսյանը՝ Գրիգորյանին. ՏԵՍԱՆՅՈՒԹ

ԱԺ արտահերթ նիստում քննարկվում է «Ազգային ժողովի կանոնակարգ» սահմանադրական օրենքում լրացում կատարելու մասին և «Կոռուպցիայի կանխարգելման հանձնաժողովի մասին» օրենքում փոփոխություն կատարելու մասին նախագծերի փաթեթը։

Նախագծով առաջարկվում է Կոռուպցիայի կանխարգելման հանձնաժողովի անդամի թափուր պաշտոնում թեկնածուի առաջադրման իրավունքով օժտել ոչ թե Ազգային ժողովի խմբակցություններին, այլ Ազգային ժողովը ներկայացնելու և նրա բնականոն գործունեությունն ապահովելու իրավասություն ունեցող անձին՝ Ազգային ժողովի նախագահին:

Առաջարկի ընդունման պարագայում կապահովվի սույն գործընթացում թեկնածուի անխոչընդոտ առաջադրումը և մրցութային խորհրդի բնականոն գործունեությունը: Միաժամանակ, նախագծերի փաթեթով առաջարկվում է համապատասխան իրավասություն վերապահել Ազգային ժողովի նախագահին:

«Լուսավոր Հայաստան» խմբակցության պատգամավոր Գևորգ Գորգիսյանը հարց ուղղեց նախագծի հեղինակ, «Իմ քայլը» խմբակցության պատգամավոր Սուրեն Գրիգորյանին․ «Պարո՛ն Գրիգորյան, անընդհատ նշում եք, որ հնարավոր չի եղել կոնսենսուսի գալ, ուզում եմ իմանալ՝ քանի՞ անգամ եք փորձել, որ չի ստացվել, որովհետև ես այդպես շատ փորձեր չեմ հիշում, գոնե մեծամասնության խմբակցության կողմից։ Եվ ինչպե՞ս եք այդ կոնսենսուսը պատկերացնում։ Քննարկումներ չեն եղել, եղել է մեկ անգամ ձեր թեկնածուն, որին մենք դեմ ենք արտահայտվել։ Մի տեսակ այստեղ անազնվություն եմ տեսնում արդեն»,- նշեց պատգամավորը։

Նա ընդգծեց, որ այս փոփոխությամբ ընդդիմությանը զրկում են պրոցեսին մասնակցելու հնարավորությունից։

Մանրամասները՝ տեսանյութում։