03.08.2026 | 22:59
Էրդողանի դաշնակից Բահչելին ու Օջալանն աջակցություն են հայտնել Թուրքիա-PKK խաղաղության գործընթացին
Հայ-ադրբեջանական սահմանին իրավիճակի կարգավորման հարցում Երևանն ապավինում է ՌԴ-ի միջնորդական ջանքերին․ Վարդան Տողանյան
Քաղաքականություն
14.07.2020 | 17:44
Հայ-ադրբեջանական սահմանին իրավիճակի կարգավորման հարցում Երևանն ապավինում է Ռուսաստանի միջնորդական ջանքերին։ ՏԱՍՍ-ի հետ զրուցում այս մասին ասել է ՌԴ-ում Հայաստանի դեսպան Վարդան Տողանյանը։
«Մենք հույս ունենք, որ Ռուսաստանը միջնորդական ջանքեր կգործադրի՝ դադարեցնելու համար այն, ինչ տեղի է ունենում հայ-ադրբեջանական սահմանին։ Հույս ունենք նաև ՀԱՊԿ-ի մեր գործընկերներից արձագանքի, քանի որ խոսքը Հայաստանի սահմանի այն հատվածի մասին է, որը ճանաչված է ՀԱՊԿ անդամների կողմից»,- ասել է դիվանագետը։
Դեսպանն ընդգծել է, որ իրադրությունը բարդացնում են նաև «Թուրքիայի ագրեսիվ հայտարարությունները»
Խնդիրը ՄԱԿ-ի Անվտանգության խորհրդի դիտարկմանը ներկայացնելու հնարավորության մասին հարցին ի պատասխան՝ Վարդան Տողանյանը նշել է, որ Երևանում նախ և առաջ գործողություններ են ակնկալում ԵԱՀԿ Մինսկի խմբի համանախագահներից։
«Միակ լեգիտիմ միջազգային մանդատն ունի ԵԱՀԿ Մինսկի խումբը, որի բոլոր երեք անդամներն էլ հենց ՄԱԿ-ի Անվտանգության խորհրդի անդամներ են՝ Ռուսաստանը, ԱՄՆ-ն, Ֆրանսիան։ Մենք արդեն գիտենք Ռուսաստանի, ԱՄՆ Պետքարտուղարության, Ֆրանսիայի արձագանքը։ Այդ պատճառով հիմա բանակցություններ են ընթանում, Հայաստանի և Ադրբեջանի ԱԳ նախարարները երեկ զրույցներ են ունեցել ՌԴ ԱԳ նախարարի հետ։ Կարծում եմ՝ սա, ամեն դեպքում, ԵԱՀԿ Մինսկի խմբի հարցն է»,- եզրափակել է ՀՀ դեսպանը։
