18.12.2025 | 16:35
Կրեմլը՝ Թուրքիայի կողմից ռուսական C-400-ները վերադարձնելու մասին
ՌԴ Գլխավոր դատախազությունը հաստատել է Խաչատուրյան քույրերի գործով մեղադրական եզրակացությունը
Հասարակություն
13.07.2020 | 13:41
ՌԴ Գլխավոր դատախազությունը հաստատել է Խաչատուրյան քույրերի գործով մեղադրական եզրակացությունն ու առաջիկայում քրեական գործը կուղարկի դատարան։ Այս մասին ՏԱՍՍ-ին ասել է քույրերի փաստաբաններից Ալեքսեյ Լիպցերը։
«Գլխավոր դատախազությունը հաստատել է Խաչատուրյան քույրերի գործով մեղադրանքը։ Այն ստորագրել է գլխավոր դատախազի տեղակալ Գրինը, որը 2019-ի դեկտեմբերին վերադարձրել էր գործը՝ Քննչական կոմիտեին առաջարկելով վերաորակավորել քույրերի գործողությունները՝ կապված անհրաժեշտ պաշտպանության վիճակում գտնվելու հետ։ Ակնհայտորեն այս ընթացքում նրա դիրքորոշման մեջ ինչ-որ բան փոխվել է։ Հիմա սպասում ենք գործը դատարան հասնելուն և նախնական դատական նիստերին»,- ասել է փաստաբանը։
Նա հավելել է, որ գործը Քննչական կոմիտե ուղարկելուց հետո դրանում ոչինչ չի փոխվել «նախաքննության դիրքորոշման օգտին, այլ հակառակը»։
Իրավապահ մարմիններում աղբյուրը ՏԱՍՍ-ին հայտնել է, որ եթե Գլխավոր դատախազությունը Խաչատուրյան քույրերի գործը դատարան ուղարկի, այն կքննվի փակ ռեժիմով․ պետական մեղադրողը նման միջնորդություն կներկայացնի՝ կապված այն բանի հետ, որ գործի նյութերում հոր կողմից քույրերի նկատմամբ բռնության և ծաղրի մասին հիշատակումներ կան։
Հիշեցնենք, որ ռուսաստանաբնակ Խաչատուրյան քույրերը մեղադրվում են հոր սպանության համար։ Աղմկահարույց սպանությունը տեղի է ունեցել 2018 թվականի հուլիսին, 57-ամյա Միխայիլ Խաչատուրյանի մարմինը հայտնաբերել էին բազմաթիվ կտրած-ծակած վերքերով: Քննության տվյալներով՝ նրան սպանել են երեք դուստրերը:
Աղջիկների պնդմամբ՝ թմրանյութի ազդեցության տակ գտնվող հայրը դանակով հարձակվել է իրենց վրա, իրենք էլ հարկադրված են եղել պաշտպանվել: Քույրերը պնդում են նաև, որ տևական ժամանակ հայրը ծաղրուծանակի է ենթարկել իրենց: Քննչական մարմինները պարզել են, որ աղջիկները չեն ստել հոր վերաբերմունքի առնչությամբ, այդ թվում՝ սեռական բնույթի ոտնձգության: Մարիա, Քրիստինա և Անգելինա Խաչատուրյաններն ամբողջությամբ ընդունել են մեղքը: Այնուամենայնիվ, քույրերին մեղադրանք է առաջադրվել նախնական համաձայնությամբ խմբակային սպանության համար: Նրանց 8-20 տարի ժամկետով ազատազրկում է սպառնում: Պաշտպանական կողմն իր հերթին պնդում է, որ տեղի ունեցածն անհրաժեշտ ինքնապաշտպանություն է։
