Իրավունքի չարաշահում է տեղի ունենում. դատախազը՝ Քոչարյանի գործի մասին. ՏԵՍԱՆՅՈՒԹ

Երևանի դատախազ Գևորգ Բաղդասարյանն այսօր միջնորդեց, որպեսզի Ռոբերտ Քոչարյանի գործով մեկնարկի դատաքննությունը։ Դատարանից դուրս գալով լրագրողների հարցին ի պատասխան Բաղդասարյանն ասաց, «Արդեն գործ ունենք իրավունքի չարաշահման հետ»։

Մեր դիտարկմանը, թե Քոչարյանի պաշտպանական թիմն ասում է, որ իրենք ավելի շատ են շահագրգռված, որ դատաքննության փուլը մեկնարկի, իրենք մեղադրանքը ջախջախեն, քանի որ հիմքը ջուր է, դատախազը նկատեց․ «Երբ մենք կմտնենք դատաքննության, մի անգամ էլ ասեմ՝ կտեսնենք՝ ինչն է ջուր և ինչն է ջախջախվում, այդպիսի հայտարարություններն ու իրենց վարքագիծը իրար չեն համապատասխանում․ եթե նույնիսկ իրենք հայտարարում են, որ մեղադրանքի կողմն է ձգձգում գործի քննությունը, պետք է մատնանշեն մի արարք, որ մեղադրանքի կողմը կատարել է»։

Բաղդասարյանը պնդեց՝ չի եղել գեթ մեկ դատական նիստ, որը հետաձգվել է իրենց բացակայության պատճառով:

«Հակառակ դրան՝ մենք ունեցել ենք դեպքեր, երբ կայացած նիստերին ներկայացրել են ինքնաբացարկի, խափանման միջոցը փոխելու միջնորդություններ, որոնց կապակցությամբ դատարանը բազմիցս դիրքորոշումներ է հայտնած եղել, և այդ միջնորդությունները նորից ներկայացնելը օրինականացրել են՝ դրանց հիմքում ձևական փոփոխություններ մտցնելով»,- ասաց դատախազը՝ ընդգծելով, որ առաջին անգամ չէ, որ իրենք իրավունքի չարաշահման մասին են խոսում․ «Դատարանի կամ մեղադրանքի կողմի որևէ վարքագիծ, որը կհանգեցներ այսպիսի ձգձգումների, չի կարող մատնանշվել»։

Մանրամասները՝ տեսանյութում։

Լիլիթ Շաբոյան