Քաղաքականություն
15.06.2020 | 16:38Մեզ ոչ միայն պետք են սահմանադրական փոփոխություններ, այլև պետք է նոր Սահմանադրություն։ Այս մասին այսօր ասաց վարչապետ Նիկոլ Փաշինյանը՝ Կառավարությունում տեղի ունեցած Սահմանադրական բարեփոխումների մասնագիտական հանձնաժողովի նիստում։
«Հիմա եկել եմ այն համոզման, որ ոչ թե քաղաքական անհրաժեշտություն կա՝ նոր Սահմանադրություն փոխելու, այլ կա պետական անհրաժեշտություն՝ նոր Սահմանադրություն ընդունելու: Մի քանի օր առաջ ես այլ համատեքստում անդրադարձել եմ այդ խնդրին, հիմա, կարծում եմ, պատեհ առիթ է անդրադառնալ այս միջավայրում»,- ասաց նա:
Փաշինյանի խոսքով՝ երբ շատ պրոբլեմների մեջ խորամուխ է լինում, անխուսափելիորեն արձանագրում է մի իրողություն, որ մեր երկրում չկա օրգանական կապ պետական կարգի և քաղաքացու կամքի միջև:
«Շատ դեպքերում, երբ մենք արձանագրում ենք, որ օրենքը, օրինականությունը, կարգը չունեն հանրային բավարար ընկալում, սրա պատճառներից մեկը, գուցե, կարող է լինել հենց դա, որ պետական կարգը չունի օրգանական կապ քաղաքացու կամքի հետ: Կարծում եմ՝ կարևորագույն պատճառներից մեկն այն է, որ Երրորդ հանրապետության պատմության մեջ մենք չենք ունեցել այնպիսի Սահմանադրություն կամ սահմանադրական փոփոխություն, որ քաղաքացին իրեն մասնակից համարի այդ պրոցեսի, այդ տեքստի և այդ պետական կարգի ձևավորմանը, և սա մեր իրականության մեջ գոյություն ունեցող ամենակարևոր, հայեցակարգային, փիլիսոփայական և բովանդակային պրոբլեմն է»,- նշեց նա։
Մանրամասները՝ տեսանյութում։
