08.05.2025 | 16:48
ԱՄՆ-ում պատահաբար տեսա «Հոկտեմբերի 27»-ի վկա Տիգրան Նազարյանին, պատկերացնո՞ւմ եք իմ վիճակը․ Քոչարյան
Իշխան Զաքարյանը հարցաքննվել է ընտրակաշառքի գործով և մանրամասներ է փոխանցել ԱԱԾ-ին
Քաղաքականություն
14.06.2020 | 19:57
Համահայկական խաղերի համաշխարհային կոմիտեի նախագահ Իշխան Զաքարյանն ԱԱԾ-ում 4 ժամ հարցաքննվել է։ Այս մասին Factor.am-ի հետ զրույցում ասաց նրա պաշտպան Գեղամ Հակոբյանը։
Իշխան Զաքարյանն անցնում է 2017 թվականին խորհրդարանական ընտրությունների ժամանակ ԲՀԿ-ի կողմից բաժանված ընտրակաշառքի գործով, որի մասին այսօր հայտնել էր ԱԱԾ-ն։ Այս և երկու այլ քրեական գործերով այսօր կեսօրից հարցաքննվում է նաև ԲՀԿ ղեկավար Գագիկ Ծառուկյանը։
«Իշխան Զաքարյանը վկայի կարգավիճակ ունի, բայց հարցաքննվել է կասկածանքի շուրջ, միջանկյալ վկա-կասկածյալ կարգավիճակով է հարցաքննվել»,- ներկայացրեց պաշտպանը։
Factor.am-ի հստակեցնող հարցին՝ Իշխան Զաքարյանը և՞ս ներգրավված է եղել ԱԱԾ-ի նշած ընտրակաշառքի բաժանման գործում, Գեղամ Հակոբյանը պատասխանեց. «Դե՝ շտաբի ղեկավարն է եղել, բայց ուրիշ որևէ բանի հետ չի առնչվել»։
Գեղամ Հակոբյանը նաև հայտնեց, որ Զաքարյանը 4 ժամ ցուցմունք է տվել և գործի շրջանակում մանրամասներ է հաղորդել։ Հարցին՝ հաստատե՞լ, թե՞ հերքել է կաշառք բաժանելու մասին տեղեկությունը, պաշտպանը պատասխանեց, որ ցուցմունքի բովանդակությունից չի կարող մանրամասներ հաղորդել․ նախաքննական գաղտնիք է։
Հիշեցնենք, որ այսօր իշխանության ներկայացուցիչների, մասնավորապես՝ Կառավարության անդամների և պատգամավորների կողմից հայտարարվեց, թե Գագիկ Ծառուկյանի ղեկավարած «Բարգավաճ Հայաստան» կուսակցությունը 2017-ին մեկ քվեի համար 10 հազար դրամ է բաժանել։
Նարեկ Կիրակոսյան
