Դասադուլն ավարտվել է, բայց դա չի նշանակում, որ մեր պայքարը դադարեցվում է. «Հանուն գիտության զարգացման» նախաձեռնության անդամ

«Կլոր սեղանի շուրջ քննարկումը մեր որդեգրած կոնստրուկտիվ քաղաքականության հետևանքն էր: Մենք նախկինում, ինչպես գիտեք, հանդիպել ենք վարչապետի, նախարարների հետ, քննարկել ենք այս թեման, եթե առաջին հայացքից այդ հանդիպումներից արձագանքներ չունեինք, ապա Արա Բաբլոյանի և մյուսների հետ հանդիպումներին արդեն հստակ պայմանավորվածություններ ձեռք բերվեցին»,- Factor.am-ի հետ զրույցում անդրադառնալով ԱԺ նախագահի հետ հանդիպումից հետո դասադուլը դադարեցնելու որոշմանը՝ ասաց «Հանուն գիտության զարգացման» նախաձեռնության անդամ Տիգրան Ազիզյանը:

Նախաձեռնության անդամը դժվարանում է ասել, թե որը կլինի իրենց հաջորդ քայլը նոյմբերի 22-ից հետո՝ երբ կլոր սեղան-քննարկումը կավարտվի, քանի որ չգիտի՝ ինչպիսին կլինի քննարկման արդյունքը. «Մենք բազմիցս նշել ենք, որ եթե դասադուլն ավարտվել է, դա չի նշանակում, որ մեր պայքարը դադարեցվում է: Մենք գնում ենք կլոր սեղանի, հստակ ցույց ենք տալիս, որ դրան պատրաստվում ենք»:

Անդրադառնալով այս օրերին իրականացված հանդիպում-քննարկումներին, Ազիզյանը նշեց, որ իրենց պետք էր հասարակության արձագանքը հասկանալ, լսել տարբեր կարծիքներ, որոնք զտնվում են և քննարկման ընթացքում կբարձրաձայնվեն:

Ի դեպ, այս օրերին տարկետման վերացման դեմ պայքարող երիտասարդներին իրենց աջակցությունն էին հայտնել 200-ից ավել գիտնականներ: Տիգրան Ազիզյանը նշեց, որ վերջին տվյալներով այդ թիվն ավելացել է. «Եթե չեմ սխալվում, ներկա պահին 350 և ավելի գիտնականներ են մեզ միացել, նրանք շարժման սկզբից էլ ցույց են տվել, որ իրենք անտարբեր չեն խնդրի նկատմամբ»:

Նախաձեռնության անդամներին դասալքության մեջ մեղադրողներին անդրադառնալով՝ Տիգրանը նշեց, որ չի ցանկանում բացասական որակումներին անդրադառնալ և հավելեց, որ ինքը ևս բանակում ծառայել է: «Հանուն գիտության զարգացման» նախաձեռնության անդամը նկատեց, որ չկան շարժումներ, որոնք թերություններ չունենան, անդրադառնալով ոստիկանների և ցուցարարների միջև բախմանն էլ՝ նշեց. «Մենք ոչ միայն փորձում ենք չգնալ բախման, այլ գիտակցաբար ամեն ինչ անում ենք, որպեսզի բախումներ չլինեն»:

Լիլիթ Շաբոյան