18.11.2024 | 09:50
Սասուն Խաչատրյանը հրաժարականի դիմում է ներկայացրել. Կոմիտեն պաշտոնապես հաստատեց
Ի՞նչ հաշվարկներ չէին կատարել «Իմ քայլը» խմբակցությունում․ մեկուսացման նպաստ սահմանող «հրատապ նախագիծը» հետաձգվեց. ՏԵՍԱՆՅՈՒԹ
Քաղաքականություն
04.06.2020 | 19:31
Այսօր Ազգային ժողովի արտահերթ նիստը սկսվեց շատերի համար անսպասելի, ոմանց համար էլ՝ անհասկանալի հայտարարությամբ։ Մեկուսացման նպաստ սահմանող նախագծի հեղինակը կոչ արեց երկրորդ ընթերցմամբ դեմ քվեարկել իր իսկ հեղինակած նախագծին։
Անհասկանալի հարցերը սկսվել էին դեռ երեկ՝ խորհրդարանի արտահերթ նիստում։ Նախագծի հեղինակը՝ «Իմ քայլը» խմբակցության պատգամավոր Նարեկ Զեյնալյանը, հիմնավորեց նախագծի հրատապությունը և կոչ արեց այն ընդունել հատուկ ընթացակարգով, այսինքն՝ 24-ժամյա ռեժիմով, այնուհետև աշխատանքի և սոցիալական հարցերի փոխնախարար Սմբատ Սաիյանը, ներկայացնելով Կառավարության դիրքորոշումը, կոչ արեց զերծ մնալ նախագծի ընդունումից, ինչը զարմանք առաջացրեց նաև իշխանական «Իմ քայլը» խմբակցության պատգամավորների մոտ։
Նույն խմբակցությունից Բաբկեն Թունյանը նկատեց, որ Կառավարության ու խորհրդարանական մեծամասնության միջև սինխրոն աշխատելու խնդիր կա։
Նախագիծը, այնուամենայնիվ, առաջին ընթերցմամբ ընդունվեց, իսկ այսօր Նարեկ Զեյնալյանի կոչը՝ դեմ քվեարկել իր նախագծին, ընդդիմադիր պատգամավորներից շատերի մոտ զայրույթ առաջացրեց։
Ընդդիմադիր պատգամավորների համար անհասկանալի է՝ ինչո՞ւ է «Իմ քայլը» խմբակցության պատգամավորն արտահերթ նիստով, հատուկ ընթացակարգով քվեարկության ռեժիմով բերել մի նախագիծ, որը, ըստ նրա պնդումների, լրացուցիչ հաշվարկների կարիք ունի։
«Իմ քայլը» խմբակցության պատգամավոր Սուրեն Գրիգորյանն այստեղ խնդիր չի տեսնում։ Պատգամավորի խոսքով՝ քննարկում է եղել և նկատել են, որ լրացուցիչ աշխատանքի տեղ կա։
Ընդդիմադիր պատգամավորները, սակայն, մտավախություն ունեն, որ սա նախագիծը չեղարկելու փորձ է։
Թեժ քննարկումից հետո նախագիծը չընդունվեց, սակայն ուղարկվեց գրավոր առաջարկությունների փուլ։ «Իմ քայլը» խմբակցության պատգամավորները վստահեցրին․ այն ոչ թե չեղարկվում է, այլ հետաձգվում՝ լրամշակման համար։
Նշենք, որ խոսքը «Ժամանակավոր անաշխատունակության և մայրության նպաստների մասին» օրենքում լրացումներ կատարելու նախագծի մասին է, որով առաջարկվում է մեկուսացման նպաստ սահմանել պարետատան ցուցումով մեկուսացած կամ ինքնամեկուսացած աշխատող անձանց համար:
Մանրամասները՝ տեսանյութում։
Անժելա Պողոսյան
