01.07.2026 | 15:05
ՔՊ քարոզարշավի զգալի մասը ֆինանսավորվել է պետական բյուջեից. «Հայաստան» դաշինքի ներկայացուցիչ․ ՏԵՍԱՆՅՈՒԹ
Մեկուսացման նպաստ սահմանող նախագիծը չընդունվեց, այն տեղափոխվեց գրավոր առաջարկությունների փուլ
Քաղաքականություն
04.06.2020 | 12:43
Ազգային ժողովն այսօր արտահերթ նիստում չընդունեց «Իմ քայլը» խմբակցության պատգամավոր Նարեկ Զեյնալյանի ներկայացրած նախագիծը, որով, մասնավորապես, առաջարկվում էր մեկուսացման նպաստ սահմանել այն անձանց համար, ովքեր վարձու աշխատող են կամ ինքնուրույն իրենց աշխատանքով ապահոված անձինք, և պարետատան ցուցումով մեկուսացել կամ ինքնամեկուսացվել են։
«Ժամանակավոր անաշխատունակության և մայրության նպաստների մասին» օրենքում լրացումներ կատարելու մասին նախագծին կողմ քվեարկեցին 26, դեմ՝ 82 պատգամավորներ։
«Բարգավաճ Հայաստան» և «Լուսավոր Հայաստան» խմբակցությունները նախապես հայտնեցին, որ կողմ են քվեարկելու նախագծին։ Նախագծի հեղինակ Նարեկ Զեյնալյանը նիստի սկզբում կոչ արեց դեմ քվեարկել իր իսկ բերած նախագծին՝ նշելով, որ լրացուցիչ հաշվարկների և լրամշակումների կարիք կա։ Զեյնալյանն ընդգծեց, որ խոսքը նախագծի չեղարկման մասին չէ։
Նշենք, որ նախագծի հրատապությունից ելնելով որոշում էր կայացվել այն երկրորդ ընթերցմամբ քվեարկության դնել 24 ժամվա ընթացքում։ Կառավարությունը բացասական եզրակացություն է տվել նախագծին։ Նախագծի հեղինակի առաջարկով՝ այն կուղարկվի գրավոր առաջարկությունների փուլ։
