Ավտոմեքենաների պետհամարանիշները գողանում են, վերադարձնելու դիմաց «Վայբերով» գումար պահանջում

«Վարորդի ընկեր» ՀԿ-ն ֆեյսբուքյան էջում լուսանկար էր տեղադրել և գրել, թե մեքենաներից նոր տեսակի գողությունների շարք է սկսվել, այս անգամ գողանում են մեքենայի պետհամարանիշները․

«Հարգելի՛ քաղաքացիներ, նման խնդրի առաջ կանգնելիս անհապաղ դիմեք Ոստիկանություն։ Հիշեցնենք, որ զույգ պետհամարանիշները գողանալու դեպքում Ճանապարհային ոստիկանությունը նույն պետհամարանիշը չի վերականգնում»։

Հաղորդագրությանը կից ներկայացված է համարները գողացած անձի «Վայբերի» համարը, որտեղ նշված է, որ եթե պետհամարանիշների տերը ցանկանում է այն հետ վերցնել, թող կապվի իրենց հետ։

Նյութի մեկնաբանություններում մեկ այլ հեռախոսահամար էլ է ներկայացված, որտեղ նշվում է, որ որոշակի գումարի փոխանցումից հետո պետհամարանիշները կվերադարձվեն տիրոջը։

Ներկայացված են երկու հեռախոսահամարներ՝ +79774081517, որը «Վայբերում» գրանցված է «пришелец» անվամբ և +79660672733 հեռախոսահամարը։

Ի դեպ, պետհամարանիշները կորցրած քաղաքացիներից մեկը, երբ գրել էր ներկայացված առաջին հեռախոսահամարին, նրան հորդորել են նախ 30 հետո արդեն կեսգին՝ 15 հազար փոխանցել իրենց հաշվին, որպեսզի պետհամարանիշները գտնվելու մասին տվյալ փոխանցեն տիրոջը։

Պարզաբանում ստանալու համար Factor.am-ը դիմեց ՀՀ ոստիկանություն, որտեղից ի պատասխան մեր հարցի տեղեկացրին․ «Արձանագրված դեպքեր կան, կան նաև հարուցված քրեական գործեր: Ոստիկանությունը ձեռնարկում է օպերատիվ-հետախուզական միջոցառումներ հանցագործությունը բացահայտելու ուղղությամբ»։

Լիլիթ Շաբոյան