25.05.2026 | 00:01
Մայիսի 25-ի վաղ առավոտյան ՀՀ ԶՈւ ավիացիան Երևանի կենտրոնում կատարելու է թռիչք․ ՊՆ
Գիտական աստիճան ստացածների շուրջ 14 %-ն է զբաղվել գիտությամբ․ ԿԳՆ
Հասարակություն
17.11.2017 | 18:08
ՀՀ կառավարության ներկայացուցիչները տարբեր առիթներով նշում են, որ թեկնածուական պաշտպանելուց հետո գիտությամբ զբաղվողները քիչ թիվ են կազմում։ Թեման արդիականություն ստացավ հատկապես «Զինվորական ծառայության և զինծառայողի կարգավիճակի մասին» օրենքի նախագծի շուրջ քննարկումների ֆոնին։
Factor.am-ը հարցմամբ դիմել է ՀՀ կրթության և գիտության նախարարությանը՝ խնդրելով տրամադրել կոնկրետ տվյալներ, թե վերջին երեք տարվա կտրվածքով թեկնածուականը պաշտպանելուց հետո գիտությամբ զբաղվողների թիվը որքան է կազմել։ Մեր հարցմանն ի պատասխան՝ ՀՀ կրթության և գիտության նախարարության գիտության պետական կոմիտեի աշխատակազմի ղեկավար Լևոն Մարդոյանը տեղեկացրել է, որ 2014 թվականի ընթացքում գիտական աստիճան ստացածների թվաքանակը 556 է, ՀՀ պետական բյուջեի հաշվին իրականացվող գիտական և գիտատեխնիկական ծրագրերում ընդգրկվածների թվաքանակը՝ 81 (ընդհանուրի նկատմամբ տոկոսը՝ 14,6)։ 2015-ին գիտական աստիճան ստացածների թվաքանակը 555 է, պետբյուջեի հաշվին իրականացվող նշյալ ծրագրերում ընդգրկվածների թվաքանակը՝ 78 (ընդհանուրի նկատմամբ տոկոսը՝ 14,1)։ Իսկ արդեն 2016-ին գիտական աստիճան ստացածների թվաքանակը նվազել է՝ հասնելով 431-ի, նշյալ ծրագրերում էլ ընդգրկվել է 61 հոգի (ընդհանուրի նկատմամբ տոկոսը՝ 14,2)։ Ստացվում է՝ վերջին երեք տարվա կտրվածքով գիտական աստիճան ստացածների շուրջ 14 տոկոսն է զբաղվել գիտությամբ։
Նշենք, սակայն, որ խոսքը վերաբերում է ՀՀ պետական բյուջեի հաշվին իրականացվող գիտական և գիտատեխնիկական ծրագրերում ընդգրկվածներին։ Ընդ որում, տվյալներում ընդգրկված չեն բուհերում և այլ կազմակերպություններում գիտական, գիտատեխնիկական և գիտամանկավարժական գործունեություն իրականացնող գիտությունների թեկնածուի գիտական աստիճան ստացած անձանց վերաբերյալ թվային տվյալները։
Աննա Բաբաջանյան
