Լրագրողի` դատական նիստի լուսաբանման իրավունքը հստակ չէ. անհրաժեշտ են կարգավորումներ

Դատական նիստն ամբողջությամբ տեսանկարահանելու իրավունքը թեև սահմանված չէ օրենքով, սակայն արգելված էլ չէ: Սա հնարավորություն է տալիս դատավորներին որոշում կայացնել՝ լրագրողներին թույլատրել դատական նիստի ընթացքում լուսանկարահանումներ/տեսանկարահանումներ կատարել, թե՝ ոչ: «Իրավունքի ուժ» ՀԿ ղեկավար Արման Ղարիբյանը, այսօր լրագրողներին ներկայացրեց կազմակերպության իրականացրած ուսումնասիրության արդյունքներն այն մասին, թե վերջին տասը ամիսներին լրագրողներին տեսանկարահանում իրականացնելու արգելման, կամ սահամափակման քանի դեպք է գրանցվել դատարաններում․«Մեր ուսումնասիրության համաձայն՝ 16 դեպք է գրանցվել, որից հինգի դեպքում արգելվել է տեսանկարահանելը, իսկ 11-ի դեպքում ժամանակային սահմանափակում է տրվել՝ հինգ րոպե, չորս րոպե, անգամ երկու րոպե»։

Դատաիրավական ոլորտը լուսաբանող լրագրող Ռուզաննա Մինասյանը Factor.am-ին ասաց, որ մարզերում դատական նիստեր լուսաբանող լրագրողների աշխատանքը համեմատաբար ավելի հաճախ է խոչընդոտվում, քան մայրաքաղաքում․«Մենք գիտենք, թե ինչ դժվարությունների են բախվում մեր մարզային գործընկերները հնչեղություն ունեցող գործերը տեսանկարահանելիս, Վանաձորում, Գյումրիում գիտեմ, որ նման դեպքեր կան»։

«Գործող օրենսգրքերից ոչ մեկը չի հստակեցնում լրագրողի՝ դատական նիստի լուսաբանման իրավունքը»,- ընդգծեց Արման Ղարիբյանը՝ հավելելով, որ Վարչական օրենսգրքով որոշումը ի վնաս լրագրողների է։ Լրագրողների աշխատանքը դատարաններում հաճախ սահմանափակվում է՝ կախված դատական գործի հնչեղությունից, նախագահող դատավորից: Արման Ղարիբյանը, որպես դրա վառ օրինակ, նշում է Ժիրայր Սեֆիլյանի գործով դատական նիստերը․«Մենք առանձին անդրադարձել ենք Ժիրայր Սեֆիլյանի գործով վկաների հարցաքննության նկարահանման արգելմանը, քանի որ ձայնագրությունը չէր արգելվել, և եթե մեղադրող դատախազը նշում էր, որ մյուս վկաները կարող են լսել և ազդվել որևէ կերպ, ապա վկան կարող էր նիստի ձայնագրությունը լսել կամ տեքստային կարդալ և ստանալ ինֆորմացիան։ Սա արհեստածին էր և լրագրողներին ապախրախուսում էր լուսաբանել նիստը»։

Նշենք, որ «Իրավունքի ուժ» ՀԿ-ն ու մի շարք լրագրողներ պատրաստվում են դիմել Արդարատատության նախարարությանը, որպեսզի օրենսդրորեն կարգավորվեն դատական նիստեր լուսաբանող լրագրողների իրավունքները։

Լիլիթ Շաբոյան