19.05.2024 | 11:19
Արտարժույթների փոխարժեքները՝ մայիսի 19-ի դրությամբ
Դատարանը մերժեց «Սասնա ծռեր»-1-ի գործից անջատված մասերը մեկ վարույթում միավորելու մասին պաշտպանական կողմի միջնորդությունը
Հասարակություն
15.11.2017 | 19:30
«Սասնա ծռեր»-1-ի գործով այսօրվա դատական նիստում դատարանը՝ դատավոր Մեսրոպ Մակյանի նախագահությամբ, ևս մերժեց գործից անջատված մասերը մեկ վարույթում միավորելու մասին պաշտպանական կողմի միջնորդությունը: Նույնաբովանդակ միջնորդությունները անջատված երկու գործերով նույնպես մերժվել են. տեղեկացնում է «Փաստինֆոն»:
Ամբաստանյալ Սմբատ Բարսեղյանի պաշտպան Հայկ Ալումյանն իր միջնորդության մեջ նշեց, որ գործից մասեր անջատելու հետևանքով խախտվում են ամբաստանյալների իրավունքները: Մասնավորապես, նույն վկաները երեք գործերով էլ հարցաքննվելու են և հնարավոր է նրանց ցուցմունքներում լինեն տարբերություններ, այս գործով ամբաստանյալները մյուս երկու գործերով ներկա չեն լինելու, որպեսզի հարցեր ուղղեն վկաներին:
Բացի այդ, եթե երեք գործերով դատավորների միջև ներքին համաձայնություն չկա գործերով դատավճիռները միաժամանակ կայացնելու մասին, ապա գործերից մեկով առաջինը կայացված դատավճռով հաստատված է համարվելու հանցագործության դեպքը, այսինքն՝ այդ դատավճիռը կանխորոշելու է մյուս երկու դատավճիռները: Ըստ պաշտպանի, այս պայմաններում խախտվելու է Մարդու իրավունքների եվրոպական կոնվենցիայի վեցերորդ հոդվածով երաշխավորված արդար դատաքննութան իրավունքը, ինչպես նաև անմեղության կանխավարկածի սկզբունքը:
Բոլոր պաշտպանները միացան միջնորդությանը: Նշվեց, որ գործից մասերն արհեստականորեն են անջատվել, դրանով խախտվում են ամբաստանյալների իրավունքները, մասնավորապես, ողջամիտ ժամկետում գործի քննության իրավունքը: Գործի քննության արդյունվետությունն, ըստ պաշտպանական կողմի, կարելի է ապահովել միայն մեկ ճանապարհով՝ միջնորդությունը բավարարելով: Եթե միջնորդությունը չբավարարվի, ըստ պաշտպանական կողմի, ապա դա կնշանակի, որ իրականացվում է ոչ թե քրեական, այլ քաղաքական դատավարություն:
Ամբաստանյալ Վարուժան Ավետիսյանն իր հերթին հավելեց, որ սա մասամբ դատարան կհամարվի, եթե քննի ապստամբության գործը, հակառակ դեպքում դա կլինի հաշվեհարդար:
Դատարանը, սակայն, չհամաձայնեց պաշտպանական կողմի փաստարկների հետ: Դատարանը վկայակոչեց ՀՀ քրեական դատավարության օրենսգրքի 309-րդ հոդվածը, ըստ որի գործի քննությունը դատարանում կատարվում է միայն ամբաստանյալի նկատմամբ և միայն այն մեղադրանքի սահմաններում, որը նրան առաջադրվել է: Դատարանը նշեց, որ համաձայն չէ, որ առաջին դատավճիռը կանխորոշելու է մյուս երկու գործերով դատավճիռները. եթե հաստատված համարվի մեղադրանքը, պետք է հաստատվի նաև այս կամ այն անձն որևէ առնչություն ունի՞ դրա հետ, թե՞ ոչ:
Գործը միավորելու անհրաժեշտությունը բացակայում է, նշեց դատարանը՝ հավելելով, որ ինքն իրավունք ունի միավորելու իր վարույթում գտնվող գործերը միայն՝ տվյալ դեպքում մյուս երկու գործերը գտնվում են այլ դատավորների վարույթում:
Փաստաբան Հայկ Ալումյանը բարձրացրեց գործից մասեր անջատելու հետևանքով առաջացած հաջորդ խնդիրը՝ սա նոր գործ է, որի նյութերը մինչև օրս չեն տրամադրվել: Այն, նյութերը, որ տրամադրվել են իրեն 14 հոգու մասով գործի նյութերն, ներկայումս քննվում է նրանցից տասի մասով գործը, ուստի իրեն անհրաժեշտ են նոր գործի նյութերը, որպեսզի ինքը կարողանա համադրել հին գործի հետ: Պաշտպանը խնդրեց իրեն տրամադրել գործի նյութերի էլեկտրոնային, իր պաշտպանյալին՝ թղթային տարբերակը:
Պաշտպան Լուսինե Սահակյանը խնդրեց նաև տրամադրել մեղադրական եզրակացությունը՝ 10-ը և ոչ թե 14 հոգու մասով: Գործով նախագահող դատավորը հայտնեց, որ իր տրամադրության տակ է ընդամենը 75 հատոր, որից վերջինը՝ 75-րդը միայն մեղադրական եզրակացությունն է:
Դատարանի պարզաբանմամբ, իրավունքի խախտում տեղի չի ունեցել, քանի որ որևէ բան չի ավելացել, իրավունքի խախտում տեղի կունենար, եթե գործին ինչ-որ բան ավելացած լիներ:
Դատարանի ու կողմերի քննարկումներից պարզ դարձավ, որ տեսագրություններով լազերային սկավառակները, որոնք առնչվում են նաև այս գործով ամբաստանյալներին, նախագահող դատավորի տրամադրության տակ չեն, դրանք գտնվում են դատավոր Արտուշ Գաբրիելյանի տրամադրության տակ: Դուք չունե՞ք այդ սկավառակները դատարանի հարցին Հայկ Ալումյանը արձագանքեց. «Ինձ ավելի շատ մտահոգում է, որ Դուք չունեք»:
