17.06.2026 | 11:17
Ինչ է ենթադրում ԱՄՆ-ի ու Իրանի միջև ստորագրվելիք 14 կետանոց հուշագիրը․ Al Arabiya-ն հրապարակել է փաստաթղթի կետերը
Հաղթանակի ամենակարևոր գրավականը միասնականությունն է. նախագահը հեռավար զրուցել է վետերան Ռոզալիա Աբգարյանի հետ. ՏԵՍԱՆՅՈՒԹ
Քաղաքականություն
09.05.2020 | 20:28
Նախագահ Արմեն Սարգսյանն այսօր հեռավար զրույց է ունեցել Հայրենական մեծ պատերազմի վետերան Ռոզալիա Աբգարյանի հետ: Այս մասին տեղեկացնում է ՀՀ նախագահի աշխատակազմի մամուլի ծառայությունը:
Նախագահը Հաղթանակի և խաղաղության տոնի առթիվ իր ջերմ շնորհավորանքներն է փոխանցել վետերանին և բարեմաղթանքներ հղել։
«Այս տոնը բոլորի տոնն է։ Կարևոր է, որ բոլորս հիշենք և դասեր քաղենք: Հաղթանակի ամենակարևոր գրավականը եղել է միասնականությունը։ Մեր բոլոր ապագա հաղթանակները կապված են լինելու մեր միասնականության հետ՝ որպես քաղաքացիներ, որպես հայեր՝ Հայաստանում, Արցախում և Սփյուռքում»,-մասնավորապես ասել է նախագահը։
Մեծ հայրենականի վետերանը շնորհակալություն է հայտնել ուշադրության ու հոգատարության համար՝ ընդգծելով, որ հաղթանակը ընդհանուր տոն է։
«Մաղթում եմ, որ ապրենք անամպ երկնքի տակ, որ մեր երեխաները միշտ լինեն առողջ, երջանիկ և կարողանան հասնել իրենց բոլոր նպատակների։ Ցանկանում եմ, որ կարողանանք մեր երիտասարդներին դաստիարակել այնպես, որ պատասխանատվություն զգան այս երկրի համար, գիտակցեն, որ ապագան իրենցն է»,- ասել է մարտի բովով որպես կապավոր անցած վետերանը, որը պատերազմից հետո մանկավարժական գործունեությամբ է զբաղվել։
Նախագահ Սարգսյանն անսպառ եռանդ ու երկար տարիների կյանք է մաղթել Ռոզալիա Աբգարյանին։
