Քոչարյանի գործով վաղվա դատական նիստը կկայանա. նա դեռ չի վիրահատվել

Ռոբերտ Քոչարյանի գործով վաղը՝ մայիսի 8-ին, նշանակված դատական նիստը տեղի է ունենալու: Դատավոր Աննա Դանիբեկյանի աշխատակազմից Factor.am-ին փոխանցեցին, որ դատավորը ներկայանալու է նիստին:

Հիշեցնենք, որ տևական ժամանակ է՝ Քոչարյանի գործով նիստերը չէին կայանում:

Ըստ պաշտոնական տեղեկատվության, Աննա Դանիբեկյանն առողջական խնդիրներ ուներ: Մարտի 1-ի արյունալի իրադարձությունների գործով առանցքային մեղադրյալ Ռոբերտ Քոչարյանի պաշտպաններից Արամ Օրբելյանը Factor.am-ին ևս փոխանցեց, որ դատական նիստը տեղի է ունենալու:

«Եթե վաղվա նիստն էլ տեղի չունենա, ապա չգիտեմ, թե անունն ինչ պետք է դնենք: Ոչ մի հիմք չունենք, որ չի կայանալու: Մեզ ասել են, որ նիստը նշանակված է, դատավորը գալու է, նիստը լինելու է»,- ասաց Օրբելյանը:

Վաղվա նիստը ուշագրավ է լինելու: Բանն այն է, որ Հայաստանի նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, ինչպես նաև Արցախի նախկին վարչապետ Անուշավան Դանիելյանը Ռոբերտ Քոչարյանի խափանման միջոց կալանքն իրենց անձնական երաշխավորությամբ փոխարինելու միջնորդություն էին ներկայացնել դատարանին: Վաղը քննվելու է այս միջնորդությունը: Արամ Օրբելյանը տեղեկացրեց, որ երաշխավորները ներկա են լինելու:

«Իմ իմանալով այո, ներկա լինելու են: Ինֆորմացիա չունեմ, որ չեն լինելու, գիտեմ, որ գալու են»: Նիստին մասնակցելու ցանկություն է հայտնել նաեւ Ռոբերտ Քոչարյանը, որն այս պահին բուժում է ստանում «Իզմիրլյան» բժշկական կենտրոնում: Այս մասին տեղեկացրեց նրա պաշտպաններից Հայկ Ալումյանը:

Հիշեցնենք, որ Քոչարյանը բժշկական կենտրոնում է գտնվում ապրիլի 28-ից: «Իզմիրլյան» ԲԿ-ից ավելի վաղ հայտնել էին, որ նա պետք է վիրահատվի: Հայկ Ալումյանը, սակայն, մեզ հետ զրույցում ասաց, որ դեռ չի վիրահատվել, բայց վիրահատություն նախատեսվում է:

Ի դեպ, Քոչարյանի վաղվա դատական նիստը համընկել է Շուշիի ազատագրման օրվա հետ:

Նարեկ Կիրակոսյան