Երևանի ավագանին հավանության արժանացրեց Վլադիլեն Բալյանին Երևանի պատվավոր քաղաքացու կոչում շնորհելու որոշման նախագիծը

Հայ կոմպոզիտոր, ՀՀ ժողովրդական արտիստ Վլադիլեն Բալյանի 96-րդ տարեդարձի առթիվ Երևանի պատվավոր քաղաքացու կոչում կշնորհվի: Համապատասխան որոշումն ընդունվեց Երևանի ավագանու այսօրվա նիստին։

Վլադիլեն Բալյանին Երևանի պատվավոր քաղաքացու կոչում շնորհելու մասին նախագծի մեջ մանսավորապես ասվում է․ «Ապրիլի 25-ին լրանում է հայ կոմպոզիտոր, ՀՀ ժողովրդական արտիստ Վլադիլեն Ալեքսանդրի Բալյանի 96-ամյակը։ Վլադիլեն Բալյանը ծնվել է 1924թ. ապրիլի 25-ին, Երևանում: Սովորել է Ռ.Մելիքյանի անվան երաժշտական ուսումնարանում, այնուհետև՝ Երևանի Կոմիտասի անվան պետական կոնսերվատորիայի դիրիժորական և խմբավարային ֆակուլտետներում: 1952-1954 թթ. եղել է Լենինականի Կարա-Մուրզայի անվան երաժշտական ուսումնարանի տնօրենը: Եղել է Հայաստանի Ռադիոյի երաժշտական հաղորդումների առաջին գլխավոր խմբագիրը: 1955-61 թթ. ղեկավարել է Հայաստանի խորեոգրաֆիկ ուսումնարանը: 1964-65 թթ. եղել է Հայֆիլհարմոնիայի տնօրենը: 1966 թ. նա ստեղծել է Ալ.Սպենդիարյանի անվան տուն-թանգարանը և մինչ 1972թ. եղել է տնօրենը: 1981թ-ից եղել է Հայաստանի ժողովրդական գործիքների համույթի ղեկավարը: Վլադիլեն Բալյանը ստեղծագործել է տարբեր ժանրերում` սիմֆոնիկ, կամերային, երգչախմբային: Հեղինակել է բազմաթիվ երգեր: Հայաստանի Կոմպոզիտորների, Ժուռնալիստների, Մոսկվայի Հայերի միությունների անդամ է: «Հայաստան-Լիբանան» կազմակերպության նախագահն է: Պարգևատրվել է ՀՀ «Մովսես Խորենացի» մեդալով: Արժանացել է ՀՀ արվեստի վաստակավոր գործչի, 2011թ.` ՀՀ ժողովրդական արտիստի կոչմանը: Ելնելով վերոգրյալից և հաշվի առնելով ՀՀ ժողովրդական արտիստ Վլադիլեն Բալյանի ներդրած ավանդն ու ակնառու վաստակը երաժշտարվեստի զարգացման բնագավառում, ինչպես նաև երկարամյա և բեղմնավոր գործունեությունը՝ առաջարկվում է Վլադիլեն Ալեքսանդրի Բալյանին շնորհել «Երևանի պատվավոր քաղաքացի» կոչումը»։

Մանրամասները՝ տեսանյութում։

Նելլի Մելքոնյան