13.10.2026 | 18:25
Ավինյանի նոր աշխատավարձը՝ հին ամսականից ցա՞ծր․ քաղաքապետի վարձատրության հանելուկը
Ովքե՞ր են 1.6 մլրդ դրամի պարգևատրված ՊԵԿ աշխատակցիները և ինչի՞ դիմաց են նրանք պարգևատրվել
Քաղաքականություն
09.11.2017 | 20:16
ԱԺ «Ելք» խմբակցության պատգամավոր, ֆինանսավարկային և բյուջետային հարցերի հանձնաժողովի փոխնախագահ Մանե Թանդիլյանը Factor.am-ի հետ զրույցում անդրադառնալով պահուստային ֆոնդից ՊԵԿ-ին 1.6 մլրդ դրամ հատկացնելու կառավարության որոշմանը, նշեց, որ պետք է բացահայտել, թե հատկապես ՊԵԿ որ աշխատակիցներին և ինչի համար է տրվում պարգևավճար:
«Երբ խոսում են պարգևավճարների մասին, պետք է ցույց տան, թե արդյունավետության ի՞նչ գործակիցներ են աշխատել, և որո՞նք են այն աշխատողները, որոնք պարգևատրվում են»,- ասաց պատգամավորը՝ շեշտելով, որ հիմնականում, երբ խոսում ենք ՊԵԿ աշխատակիցների պարգևատրման մասին, դրանք այն աշխատակիցներն են, որոնց գրած տուգանքների և ստուգումների քանակն է շատ:
«Արդյոք պարգևատրվող աշխատակիցների արդյունավետությունը կապ ունի՞ չարաշահումների հետ, որ կան պետեկամուտների կոմիտեում»,- հարցադրում արեց պատգամավորը:
Նշենք, որ կառավարության այսօրվա նիստում գործադիրը 1.6 մլրդ դրամ տրամադրեց պետական եկամուտների կոմիտեին՝ աշխատավարձերի բարձրացման և պարգևավճարների համար: Եվ սա՝ այն պարագայում, երբ Աշխատանքի և սոցիալական հարցերի նախարար Արտեմ Ասատրյանն օրերս հայտարարում էր, թե թոշակառուների կենսաթոշակը 1000 դրամով ավելացնելու համար 5 մլրդ դրամ է պետք, որը կառավարությանը չունի:
Վարչապետ Կարեն Կարապետյանն իր վերջին ասուլիսում բավական լավատեսական ցուցանիշներ ներկայացրեց՝ ասելով, որ իրենց սոցիոլոգիական հարցումների համաձայն, բնակչության 4 տոկոսը բարեկեցության աճ է զգացել այս տարի: Ընդդիմադիր պատգամավորը թերահավատ է, նա չի պատկերացնում, թե որտեղ կարող էր վարչապետն արած լինել այդ հարցումները:
«Մենք այն եզակի երկրներից ենք, որտեղ աշխատող մարդը նույնպես համարվում է աղքատ: Նվազագույն աշխատավարձ են ստանում մարդիկ, ստիպված են այդքանով գոնե աշխատել: Այո՛, գործազրկության տոկոսը կարող է իջնել, բայց աղքատությունը չնվազել: Չգիտեմ այդ հարցումները որտե՞ղ է անում վարչապետը»,- նշեց նա:
«Ելք» խմբակցությանն այսօր անուղղակի մեղադրում են տարկետման սահմանափակման օրինագծի դեմ ուսանողների դասադուլն ու ցույցերը կազմակերպելու և քաղաքականացնելու մեջ: «Իհարկե հրահրելու մասին խոսք չկա, բայց որ սատարում ենք ուսանողներին՝ իրենց իրավունքների համար պայքարել, միանշանակ կողմ եմ: Անգամ եթե համաձայն չլինեի ուսանողների հետ, դա իրենց իրավունքն է»,- նշեց «Ելքի» պատգամավորը:
Ինչ վերաբերում է օրինագծին դեմ ուսանողներին ու դասախոսներին ճնշելու փորձերին, Մանե Թանդիլայնն ասաց, որ այդ առթիվ դիմել է ԿԳ նախարարին: «Որևէ մեկը նրանց չի կարող արգելել: Ինչպես ենք ակնկալում գիտնական «արտադրվի» մի հաստատությունում, որտեղ դասախոսը ճնշված է: Անհնար է: Պնդել եմ, որ կրթության նախարարն անդրադառնա այս հարցին և դադարեցնեն ճնշումները ուսանողների և դասախոսների նկատմամբ»:
Մանրամասները դիտեք «Ելք» խմբակցության պատգամավոր Մանե Թանդիլյանի հետ հարցազրույցում:
Մարինե Խառատյան
