30.08.2026 | 20:00
Երեխայի կյանքը՝ հեռախոսում․ թվային «թմրամոլության» դեմ պայքարի ՇԵՐՏԵՐԸ․ ՏԵՍԱՆՅՈւԹ
ՔՈՎԻԴ-19 համավարակի ընթացքում պլանային պատվաստումների իրականացումը կենսական նշանակություն ունի․ ԱՀԿ և ՅՈՒՆԻՍԵՖ
Հասարակություն
22.04.2020 | 21:21
ՔՈՎԻԴ-19- ի համավարակն ակնառու հիշեցում է առ այն, որ վարակիչ հիվանդությունները սահմաններ չունեն: Բոլոր երկրներն են խոցելի՝ անկախ եկամտի մակարդակից կամ իրենց առողջապահական համակարգի հզորությունից: Եվրոպական տարածաշրջանում, որտեղ միլիոնավոր մարդիկ շաբաթներ շարունակ ապրում են ինքնամեկուսացման մեջ, իսկ մահացել է ավելի քան 100 000 մարդ, նոր տիպի կորոնավիրուսի տարածման արագությունն ու կործանարար հետևանքները, ամբողջովին վերափոխել են մեր կյանքը։
ՔՈՎԻԴ-19 պատվաստանյութի սուր անհրաժեշտությունը ընդգծում է պատվաստումների առանցքային նշանակությունը կյանքի պահպանման և տնտեսության կայունության համար: Մինչ աշխարհում գիտնականները աշխատում են նոր տիպի կորոնավիրուսի դեմ պատվաստանյութ ստեղծելու ուղղությամբ, իսկ առողջապահական համակարգերը գերծանրաբեռնված են ՔՈՎԻԴ-19-ի դեմ պայքարելով, պլանային պատվաստումների ազգային ծրագրերը կարևոր են առավել, քան երբևէ։ Մեր տարածաշրջանի բոլոր պետությունները պետք է օգտագործեն բոլոր հնարավորությունները մարդկանց այն բազմաթիվ հիվանդություններից պաշտպանելու համար, որոնք կանխելու համար պատվաստանյութերն արդեն առկա են:
Երբ պլանային պատվաստումները բաց են թողնում, մեծանում է հիվանդության բռնկման ռիսկը: ԱՀԿ-ի եվրոպական տարածաշրջանում 2018թ․ գրեթե 527 000 երեխա չի ստացել կարմրուկի դեմ պատվաստման առաջին չափաբաժինը: Մեկ տարի անց՝ 2019թ․, կարմրուկի վիրուսը Եվրոպայում ի հայտ բերեց իմունային համակարգի խոցելիություն՝ վարակելով ավելի քան 100 000 մարդու բոլոր տարիքային խմբերում: Պատվաստումների միջոցով երեխաների, երիտասարդների և մեծահասակների պաշտպանությունը կանխարգելելի հիվանդություններից պարտադիր է առողջապահական համակարգերի կայունության համար:
«Գիտենք, որ վարակիչ հիվանդությունների նկատմամբ խոցելիությունը մեկ վայրում հանրային առողջության համար սպառնալիք է դառնում ամենուր», – նշել է ՅՈՒՆԻՍԵՖ-ի Եվրոպայի և Կենտրոնական Ասիայի տարածաշրջանի գրասենյակի ղեկավար Աֆշան Խանը: «Հույժ կարևոր է, որ այս ճգնաժամի ընթացքում պլանային պատվաստումները շարունակվեն՝ միևնույն ժամանակ հավուր պատշաճի պաշտպանելով բուժաշխատողներին և պատվաստումներ ստացող անհատներին: Առաջնահերթությունը պետք է տրվի առավել խոցելի երեխաներին, որոնք մինչև հիմա բաց են թողել պլանային պատվաստումները»:
Եթե այս աննախադեպ ժամանակներում ՔՈՎԻԴ-19-ի դեմ պայքարին ուղղված միջոցառումների հետևանքով պլանային պատվաստումների ժամանակավոր ընդհատումներ են տեղի ունենում, իրավիճակի կայունացումից հետո պետությունները պետք է պլանավորեն դրանք վերսկսել հնարավորինս արագ։
Պետությունները պետք է պատրաստ լինեն պատվաստել ավելի բարձր ռիսկային գոտում գտնվողներին և ապահովեն, որ բոլորին, այդ թվում՝ ամենախոցելի խմբերին, հավասարապես հասանելի լինի ՔՈՎԻԴ-19-ի պատվաստանյութը, երբ այն ստեղծվի։
ԱՀԿ-ն և ՅՈՒՆԻՍԵՖ-ը շարունակելու են աջակցել կառավարություններին՝ ամրապնդել պատվաստումների իրենց ծրագրերը, այդ թվում՝ պատվաստումների համահավասար իրականացման, պատվաստումների միջոցով կանխարգելելի հիվանդությունների վերահսկողության, համայնքային ներգրավվածության և կրթության ուղություններով ռազմավարական պլանավորմանը:
Երբ անցում կատարենք նոր ապագայի, պատվաստումները կշարունակեն բոլորի առողջության և բարեկեցության հիմքը հանդիսանալ: Որևէ մեկին հետևում չթողնելու համար համերաշխության, համատեղ գործողությունների և նվիրվածության շնորհիվ է, որ կկարողանանք միասին ավելի առողջ ապագա կերտել:
