Փողոցում հայտնված անապահով ընտանիքը դիմում է վարչապետին. համաճարակի արդյունքում զրկվել են աշխատանքից. ՏԵՍԱՆՅՈՒԹ

Էջմիածնում բնակված, սակայն կացարանը կորցրած Շանթ Մարաշյանի չորս հոգանոց ընտանիքը հայտնվել է փողոցում։ Պատճառը համաճարակն է։ Մինչև այդ Շանթն ու նրա կինն օրավարձով աշխատել են ռեստորանում, օրական 5000-ական դրամ աշխատավարձ ստացել։
Անօթեւան մնացած ընտանիքը Էջմիածնից ոտքով հասել է Երևան՝ այստեղ խնդրի լուծում գտնելու ակնկալիքով։ Մինչ այդ դիմել են Էջմիածնի քաղաքապետարան, Աշխատանքի և սոցիալական հարցերի նախարարություն։

Factor TV-ին դիմած Շանթն ու նրա կինը պատմեցին, որ հայտնվել են անելանելի վիճակում։ «Մենք հեղափոխություն ենք արել։ Իսկ հիմա ընտանիքին մղկտացնո՞ւմ են։ Ես հեղափոխություն եմ արել, ընտրել եմ իմ վարչապետին։ Բայց այսօր վարչապետն անտեսում է»,- ասաց Շանթը։

Նա պատմեց, որ վարձով բնակարանից տանտերը հանել է, հիմա գնալու տեղ չունեն։ Գումարի բացակայության հետևանքով չեն կարող նաև սնունդ գնել։ Ընտանիքի երկու անչափահաս երեխաներն էլ մեկ ամսից ավելի է՝ դասապրոցեսին չեն մասնակցում, քանի որ համակարգիչ չունեն։ Այս պահին ընտանիքի միակ եկամուտը նպաստն է, որը կազմում է 30 հազար դրամ։ Իսկ սննդի խանութներում կուտակած պարտքը դրանից շատ ավելին է։

Ընտանիքը դիմում է վարչապետին, կառավարությանը և բոլոր այն մարդկանց, ովքեր կարող են որևէ հարցով աջակցել, քանի որ կառավարության աջակցության ծրագրերից որևէ մեկի շահառու չեն։ Խնդրում են գոնե ժամանակավոր կացարան տրամադրել, մինչև համաճարակն անցնի։ Factor TV-ն հրավիրում է պատկան մարմինների ուշադրությունն այս պահին անօթևան դարձած ընտանիքի խնդիրներին։

Մանրամասները՝ տեսանյութում:

Մերի Մարտիրոսյան