Մարդիկ, որ տարիներով թալանել են երկիրը, շարունակում են ինչ-որ հնարքներով լքել Հայաստանը․ Բաբաջանյան. ՏԵՍԱՆՅՈՒԹ

Երկու տարի է` մեր պետությանը չի հաջողվում ստեղծել այնպիսի դատաիրավական համակարգ, որտեղ ծանրագույն հանցագործությունների մեջ մեղադրվող ամբաստանյալի հարցը կլուծվի ոչ թե կաթողիկոսի բարեհաճության, նախագահների կամ վարչապետների տրամադրություններով կամ քաղաքացիների ճաշակով, այլ միայն ու միայն արդար դատարանի կողմից: Ազգային ժողովում այսօր Կառավարության հետ հարցուպատասխանի ժամանակ նման հայտարարությամբ հանդես եկավ պատգամավոր Արման Բաբաջանյանը։

«Բանը հասել է նրան, որ ծանրագույն հանցագործությունների մեջ մեղադրվող նախկին պաշտոնյաներից մեկը՝ Ռոբերտ Քոչարյանի պաշտոնավարման ժամանակ աշխատակազմի ղեկավար աշխատած անձը, նախօրեին հարցազրույց է տալիս և իշխանություններին, ըստ էության, գործարք է առաջարկում, որ պետք է հնարավորություն տալ երկրի կայացած տնտեսական, ընտանեկան կլաններին Հայաստանում խաղի նոր կանոններով բիզնեսի զարգացման համար և քրեական հետապնդումների փոխարեն՝ խրախուսել նրանց կողմից նոր նախագծերի, նոր ներդրումների նախաձեռնությունը: Մարդիկ, ովքեր այս պահին պիտի բոլորովին այլ տեղ գտնվեին, այսպիսի առաջարկներ են բերում հրապարակ, ինչպե՞ս եք վերաբերվում այս առաջարկներին»,- նշեց պատգամավորը՝ ընգծելով, որ մարդիկ, ովքեր տարիներ շարունակ կեղեքել, թալանել են երկիրը, շարունակում են ինչ-որ հնարքներով լքել Հայաստանը:

Պատգամավորը թեև իր հարցն ուղղել էր վարչապետ Նիկոլ Փաշինյանին, պատասխանեց արդարադատության նախարար Ռուստամ Բադասյանը։

Մանրամասները՝ տեսանյութում։