Հասարակություն
13.04.2020 | 16:27ԲՀԿ-ական պատգամավոր Նաիրա Զոհրաբյանն այսօր ԱԺ հատուկ նիստում հարց ուղղեց ՀՀ պարետ, փոխվարչապետ Տիգրան Ավինյանին. «Առաջնային հարվածի տակ գտնվող թիրախային խմբում են նաև չգրանցված օրավարձով աշխատողները: Չեմ ուզում էմոցիոնալ բաներ ասել, բացել իմ հեռախոսը, ձեր հեռախոսը, հազարավոր մարդիկ չգրանցված աշխատողներ են, լուծում ստանալո՞ւ է նրանց խնդիրը: Սև ցուցակում հայտնված ՓՄՁ-ների խնդիրն ի՞նչ կերպ է լուծվելու, աջակցության որևէ ծրագիր նախատեսվելո՞ւ է նրանց համար»:
Ի պատասխան՝ Ավինյանը նշեց, որ գրանցված աշխատողներից բացի՝ սոցիալական թիրախային խմբերը ևս ստանալու են աջակցություն, երեխաներին աջակցություն է տրվում. «11-րդ միջոցառմամբ, որը Կառավարությունն այսօր է ընդունել, 50% տոկոսի չափով փոխհատուցելու ենք մինչև 10.000 դրամ գազի սպառման ծավալներ ունեցող անձանց ծախսը և մինչև 5.000 դրամ էլեկտրաէներգիայի ծախսը, մոտ 220 հազար բաժանորդի ծախս է»:
Ավինյանն ասաց, որ հիմա փաստացի օգտվում են այն տնտեսվարողները, որոնք պատշաճ իրենց աշխատողներին գրանցել են ու բարեխիղճ են եղել:
Հիշեցնենք, որ Ազգային ժողովը հատուկ նիստում քննարկում է արտակարգ դրության ռեժիմը 30 օրով երկարաձգելու վերաբերյալ «Հայաստանի Հանրապետությունում 2020 թվականի մարտի 16-ին հայտարարված արտակարգ դրության ժամկետը երկարաձգելու և Հայաստանի Հանրապետության կառավարության 2020 թվականի մարտի 16-ի N 298-Ն որոշման մեջ փոփոխություններ և լրացում կատարելու» մասին նախագիծը։
Մանրամասները՝ տեսանյութում։
