08.05.2024 | 15:39
Պեսկովը Փաշինյան-Պուտին հանդիպումը «սպասված է» անվանել, Ալիևի ներկայացուցիչը՝ «Զանգեզուրի միջանցքի» մասին․ ԼՈՒՐԵՐ
Արցախում արգելվեցին գործադուլները, հավաքները, 20 և ավելի անձանց մասնակցությամբ միջոցառումներ
Քաղաքականություն
12.04.2020 | 20:51
Ժամը 22։00-ից Արցախում ուժի մեջ կմտնի Արտակարգ իրավիճակ հայտարարելու մասին նախագահ Բակո Սահակյանի հրամանագիրը։ Ստեղծվել է պարետատուն, և պարետ է նշանակվել պետնախարար Գրիգորի Մարտիրոսյանը։
Ի թիվս այլ սահմանափակումների՝ արգելքներ են սահմանվում նաև հավաքների, հանրային միջոցառումների իրականացման նկատմամբ։
Այսպես, Արցախի ամբողջ տարածքում արգելվում է գործադուլների կազմակերպումը, անցկացումը և դրանց մասնակցելը: Արցախի Հանրապետության ամբողջ տարածքում արգելվում է հավաքների կազմակերպումը, անցկացումը և դրանց մասնակցելը, բացառությամբ՝ Պարետի որոշմամբ սահմանված դեպքերի:
Պարետ Գրիգորի Մարտիրոսյանի որոշմամբ՝ արգելվում է հանրային միջոցառումների կազմակերպումը, անցկացումը և դրանց մասնակցությունը: Հանրային միջոցառումներ են 20 և ավելի անձանց մասնակցությամբ անցկացվող համերգները, ցուցահանդեսները, ցուցադրությունները, թատերական ներկայացումները և սպորտային, մշակութային, կրթական այլ միջոցառումները, ժամանցային միջոցառումները, տոնական և հիշատակի միջոցառումները, ներառյալ, բայց չսահմանափակվելով ծննդյան, հարսանյաց (նշանադրության), թաղման միջոցառումները։
Դատելով Արցախի պարետի որոշումից՝ կորոնավիրուսի տարածումը կանխելու նպատակով արգելքի տակ են հայտնվում, օրինակ, ընդդիմության հանրահավաքները, սակայն չի չեղարկում ապրիլի 14-ի նախագահական ընտրությունը։ Նախորդ քվեարկության ժամանակ, հիշեցնենք, արձանագրվել էին ընտրատեղամասերի առաջ կուտակումներ, հերթեր։
