11.02.2026 | 16:12
Իրանը չի ձգտում ատոմային զենքի. Փեզեշքիանը հայտարարել է, որ չեն զիջի չափազանց պահանջներին
Սահմանափակումներ՝ Արցախում գործող լրատվամիջոցների համար
Քաղաքականություն
12.04.2020 | 20:30
Ժամը 22։00-ից Արցախում ուժի մեջ կմտնի Արտակարգ իրավիճակ հայտարարելու մասին նախագահ Բակո Սահակյանի հրամանագիրը։ Ստեղծվել է պարետատուն, և պարետ է նշանակվել պետնախարար Գրիգորի Մարտիրոսյանը։
Ի թիվս այլ սահմանափակումների՝ արգելքներ են սահմանվում նաև լրատվամիջոցների աշխատանքում։
Այսպես, ՀՀ-ի օրինակով՝ լրատվամիջոցները կորոնավիրուսի թեմայով հրապարակումներ անելիս պարտադիր հղում են անում Պարետատան տրամադրած տեղեկատվությանը։ Ամբողջությամբ պետք է արտացոլվի պաշտոնական տեղեկատվությունը այն դեպքերում, երբ հաղորդվում է կորոնավիրուսային հիվանդության վարակման առկա և նոր դեպքերի, անձանց առողջական վիճակի, վարակի աղբյուրների, առկա կամ հնարավոր վարակակիր անձանց հետ շփված այլ անձանց շրջանակի, զննում (վարակի թեստավորում) անցնող անձանց և ազատ տեղաշարժվելու իրավունքի սահմանափակման ենթարկված կամ ինքնամեկուսացված անձանց քանակի, առողջապահության բնագավառում լիազոր մարմնի կողմից իրականացվող միջոցառումների և դրանց վերաբերող տվյալների վերաբերյալ հրապարակումների, տեղեկատվական նյութերի, հարցազրույցների, հաղորդումների (այսուհետ բոլորը միասին` հաղորդում) հրապարակային տարածումը, փոխանցումը, ներառյալ ինտերնետային կայքերում և սոցիալական ցանցերում դրանց հրապարակումների ձևով։
Ընդ որում՝ լրատվամիջոցներն իրավունք չեն ունենա խմբագրել տեղեկությունը։ Իսկ եթե լրատվամիջոցը առանց պաշտոնական հիմք է հրապարակում կորոնավիրուսի թեմայով տեղեկությունը, պարտավոր է հրապարակել Պարետատան տրամադրված, հրապարակված հերքումը կամ պարզաբանումը՝ այն ստանալուց (հրապարակվելուց) հետո 2 ժամվա ընթացքում։
Միաժամանակ, ԶԼՄ-ները պետք է ապահովեն վերջինիս տարածումը նույն հարթակներով, ինչ կիրառվել է հաղորդման հրապարակման ժամանակ։ Օտարերկրյա զանգվածային լրատվամիջոցների կողմից նոր տիպի կորոնավիրուսի համավարակի վերաբերյալ հրապարակված տեղեկատվական կամ վերլուծական նյութերի ամբողջական կամ մասնակի արտատպման դեպքում ԶԼՄ-ները պետք է հրապարակեն նյութի սկզբնաղբյուրը՝ նյութի վերնագրում։
Այս սահմանափակումները չեն կիրառվում պետական պաշտոնատար անձանց կողմից կատարված հաղորդումների կամ նրանց հաղորդումներին կատարված հղումների նկատմամբ, օտարերկրյա պետությունների ղեկավարների, պետական մարմինների և (կամ) նրանց ներկայացուցիչների պաշտոնական կայքերին, սոցիալական ցանցերի պաշտոնական էջերին կատարված հղումների նկատմամբ:
